Pwerte na ka busy ni Kong. Manny “Pacman” Pacquiao sa iyang karera sa politika, negosyo, pagka-pastor ug sa sports. Butang nga di angay ikalagot sa uban tungod kay iyaha man nang kinabuhi ug iyahang panahon aron mapahimuslan niya ang grasya nga niabot kaniya.
Kun itandi si Pacquiao sa ubang mga sikat nga boksidor sa nasud, siya maoy labing malampuson ug ‘wise’ sa pagdumala sa iyang bahandi pinaagi sa pag-invest niini sa mga negosyo.
Daghan ang misaway kaniya sa pagapil-apil niya sa politika, dayon sa pag-artista, pagkahimong pastor, basketball ug karon usa siya sa nanag-iya sa One FC Asia nga nag-promote og mga sangka sa mixed martial arts.
Apan si kinsa man ning uban nga manaway? Si Pacman praktikal lang nga atleta nga dunay talagsaong abilidad ug siguro swerte. Midato siya bunga sa iyang paningkamot, sakripisyo ug pasakit apan wala siya makalimot sa kung asa siya gikan.
Usa lang si Pacquiao sa talagsaong mga boksidor ug atleta sa Pilipinas nga nahimong malampuson sa iyang karera ug pamilya. Dako gyud og impluwensya sa tawo o ni bisan kinsa ang pakig-relasyon sa Kahitas-an nga sagad makita sa mga lihok ni Pacquiao sa ibabaw o sa gawas man sa ring.
Bisan pa og motak-op na ang karera ni Pacman, magpabilin gihapon ang iyang legasiya nga dili babag ang kakabus sa usa ka tawo aron pagkab-ot sa mga damgo niini basta ubanan kini sa kinasing-kasing nga paningkamot ug pag-ampo.
Duha o tulo na lang ka mga away isab-it na ni Pacman ang iyang gloves. Apan di na mapapas sa kasaysayan sa boksing nga dunay usa ka Filipino nga nakaangkon og walo ka world title belts sa walo ka weight divisions.