Daghan na ang mga ebidensya, sirkumstansya ug mga pamahayag nga nahipos kabahin sa pagkahagsa sa Malaysian Airline flight MH 17 diin 298 ka pasahero apil na ang tulo ka Filipino ang nakalas niadtong Hulyo 17 sa Eastern Ukraine.
Ang tanan nagtumbok sa mga pro-Russian nga mga rebeldeng Ukrainians nga klaro kaayong gisuportahan sa Russia.
Ang Pilipinas mopadala og mga eksperto aron molangkob sa international prosecutors nga moimbestigar sa nahitabo aron panubagon ang mga sad-an sa kamatayon sa mga inosenteng sibilyan. Sama sa ordinaryong mga kaso kinahanglang mag-agi kini sa patas nga husay sa korte ang tanan una pa makapahamtang og silot niadtong mga sad-an. Kauban sa Pilipinas sa prosecution team mao ang Australia, Malaysia, New Zealand, the Netherlands, Belgium, Britain, Canada, Germany, Indonesia , Ukraine ug Amerika .
Usa ka dakong tahas alang sa prosekusyon ang nagpaabot kanila kay ang pag-adto pa lang gani sa crash site aron paghipos og mga importanteng ebidensya nga maghatag og clue sa mga imbestigador lisod na kaayo tungod sa pagmagahi sa mga rebelde nga makapahigayon og makuti nga pagpaniksik ang mga imbestigador.
Dugangan pa ang nagpadayong gubat tali sa tropa sa Ukraine ug mga rebelde ug ang nakitang dayag kaayong pagdapig sa Presidente sa Russia nga si Vladimir Putin ngadto sa mga rebelde.
Sa pagkakaron, bugtong mahimo sa European Union mao ang economic sanctions batok sa Russia tungod sa klaro kaayo niining pagsuporta sa mga rebelde. Ang pangutana karon, motabang kaha pagdakop ang Russia kung mailhan kinsa ang sad-an?