Ang simbahang Katoliko adunay kaugalingong patakaran nga gisunod. Apil na niini mga lagda diha sa pagbendisyon sa mga magpabunyag, magpakasal ug sa minatay. Ang pangutana mao: “Mga Romano Katoliko lang ba diay ang ilang hatagan niini?
Niining bag-o lang, may minatay nga wa benditahi sa St. Therese Parish Church ug St. Jude Parish, Lahug ning dakbayan kay matud pa, miyembro sa kulto ang namatay.
Ang nakapait lang, kay mialegar ang tagtungod nga ang namatay dili sakop sa kulto. Gani, nangalagad pa sa usa ka Katolikong kapilya. Mipuno pa gyud ang anak sa namatay nga silang tibuok pamilya, solidong Katoliko. Kun tinuod man kining gipanulti sa mga tagtungod, dako gyud tinuoray kaayo kining kontrobersiyaha nga angay tubagon dayon sa simbahan.
Kay alang ning tagsulat, bisa’g kulto pa ang maong minatay, angay gihapon kining benditahan. Nahinumdom ba kamo, Msgrs., Fathers, sa estorya sa The Prodigal Son? Hasta kapila ninyo kini balikbalika’g basa diha sa bibliya. Di, ba?
Di ba gikalipay sa amahan ang paghibalik sa iyang badlungong anak? Di ba iya kining gihikayag engrande tungod sa tumang kalipay, kay ang iyang anak nga dugay nang namatay, nabanhaw?
Si Hesukristo mianhi sa kalibotan dili alang sa mga maayo. Kun dili, para sa mga makasasala. Gani, bisa’g gilansang na Siya sa krus, gitanyag gihapon Niya ang kaluwasan alang sa mga makasasala. Unya, kining giingon ninyong kulto, kinsa sa kataposan, gustong mobalik sa mga Kamot sa Ginoo, inyo na hinuong gibalibaran? Di ba angay man gani tang maglipay kay ang igsuon natong karnero nga hagbay dang nawala, karon mahibalik na sa poder sa Ginoo?
Ang bendita sagradong tubig sa kaluwasan. Ato rang simbahan, Msgr. ug Fathers, ang naa niini. Unya, nganong magmakuli man ta paghatag niini ngadto sa nanginahanglan? Ang Langit baya, abiyerto sa tanang tinuohan. Unya, nganong sirad-an man nato, Msgr., Fathers, kun may laing tinuohan nga buot magpatabang kanato para sa gituohan niyang kaluwasan? May gipili ba diay ang benditahan? May gugma ba diha sa inyong isig ka tawo kining inyong gihimo? Hala, ka?