Daghan ang buot mamahimong adunahan nga tungod niini daghan ang naningkamot gayud. Apan kuyog ning maong tinguha mao nga maadunahan ug makakab-ot sa gitinguha mao man ang kahadlok nga morisgo. Lisud ang pagrisgo labi na kun dili ka seguro. Ingon ini usab ang hulagway kun buot kitang mosulod sa Gingharian sa Langit. Adunay talikdan aron dunay mahangop. Apan bisan pa man sa risgo kita makaseguro nga dunay nindot nga nagpaabot kanato. Sama sa gipakita sa duroha ka karakter sa atong ebanghelyo karong Domingoha. Silang duha pulos dunay gisakripisyo aron mahuptan ang mutya ug ang bahandi. Silang duha managsama ang gibati sa dihang ilang nakaplagan ang ilang gipangita ug nadiskubre. Silang duha pulos nagmalipayon. Silang duha pulos nahimong kontento. Ang Dios tuburan sa tanang kaayo. Kuyog niini ang pagdapit kanato nga mohimo sa atong desisyon. Unsa man ang imong pilion? Ang kalibutan nga molabay lamang? o ang Langitnong Gingharian nga maghatag kanimo og katagbawan?