Ang kaniadto gikonsiderar nga labing luwas ug way hasol nga pagbiyahe ug paghatud og mga kargamento, natay-og nunot niining mga nagsunod nga mga pagkahagsa sa mga civilian airlines, hangtud karon wa pay klarong tubag kun unsay hinungdan sa maong mga aksidente.
Upat ka civilian airlines ang nangahagsa gikan sa bulan sa Marso hangtud ning bulan sa Hulyo, dala ang dul-an 900 ka kinabuhi ang nakalas ug napulo ang naka-survive.
Ang labing uwahi niini nahitabo niadtong Hulyo 24 sa Algiers dihang usa ka Swiftair McDonnell Douglas MD-80 nga gi-operate sa Air Algerie ang nahagsa. Duna kini 110 ka pasahero ug crew samtang naglupad gikan sa Burkina Faso padung sa Algiers.
Samtang niadtong Miyerkules, nahagsa usab ang ATR-72 nga gi-operate sa TransAsia Airways sa Penghu Island sa Taiwan Strait, 44 ka pasahero ang nakalas ug milagrong dunay napulo ka tawo nga buhi.
Niadtong Hulyo 17, nakugang ang kalibotan dihang nahagsa ang Malaysian Airline MH17 flight gikan sa Amsterdam padung sa Kuala Lumpur. Giingong gitirahan kini og surface to air missile (SAM) samtang naglupad sa Eastern Ukraine, 298 ka tawo ang patay.
Lab-as pa sa tanan ang kalit nga pagka –missing laing Malaysian Airline flight MH370 nga dunay 349 ka pasahero ug crew. Gikan kini sa Kuala Lumpur padung sa Beijing niadtong Marso 8 dihang kalit nga nawala sa radar diha sa West Philippine Sea.
Ang mga imbestigador nagkara-kara sa pagpangita og mga tubag kun unsay hinungdan. Kinahanglan kini aron mapalambo pa ang safety sa air travel sa kalibotan.