Abi nako og tinuod ang giingon ni Dr. Paulus Mariae Cañete nga si Mayor Johhny de los Reyes mao nay presidente sa Talisay City College (TCC).
Didto sa Tapok Tapok sa mga sakop sa media kaniadtong Biyernes, akong gisukit si Dr. Cañete bahin sa maong isyu kay usa baya siya sa gitudlo ni Mayor JVR sa maong katungdanan nga gikagubtan sa Talisay.
Aw malagmit ulahi na kaayo sa mga kasayuran si Dr. Cañete bahin sa kalihukan sa politika sa Talisay kay mora’g hingpit na man siyang mibiya sa maong dakbayan.
Nasayran nato nga ang gitudlo sa TCC Board of Trustees isip presidente sa Talisay City College mao si Dr. Gamaliel Vicente Jr.
Kini human mopahawa sa katungdanan ang duha nga una’ng gitudlo sa katungdanan nga sila si Dr. Joseph Sol Galleon ug si Dr. Ester Velasquez.
Hinuon basin kun si Dr. Vicente na maoy ma-permanente sa maong posisyon ilabi na nga taga Talisay usab kini ug dugay na nagserbisyo sa gobiyerno sa Talisay ug bisan sa pribado nga katungdanan isip dean sa UV College of Engineering and Architecture.
Husto ang giingon ni Mayor JVR nga iya ra nga panid-an si Dr. Vicente, kinsa usa niya ka suod nga higala ug kugihan sa trabaho.Apan kun gamiton ni Dr. Vicente ang iyang katungdanan sa pamolitika, mibahad si Mayor JVR nga dili siya magpanuko sa pagrekomendar nga paphaon kini sa katungdanan.
* * *