Dear Atty. Divine,
Duna lang unta ko’y ipangutana kabahin sa among gipuy-an karon. Nagpuyo kami sulod sa usa ka park ug 12 kami ka bubong. Kapin na sa 12 ka tuig ko nga nagpuyo, ang uban nako’ng silingan nagpuyo kapin na sa 20 ka tuig. Kaduha na kami gipa-demolis sa lain-laing nangangkon nga tag-iya apan ang ending laing kompaniya diay ang tag iya. Karon gipatawag kami og meeting sa kompaniya ug anaa ‘sab ang presensya sa taga DWUP. During sa meeting gitanyagan mi og P10 mil nga financial assistance sa kompaniya ug P5 mil kuno sa DWUP unya naay relocation site nga libon pa. Ang problema atorni kay gusto man dayon nila nga amo na nga gub-on ang among mga balay ug didto na kuno mi hatagan sa P15 mil sa relocation site. Ang akong pangutana: Unsa may angayan namo nga buhaton nga nagkaduol na ra ba ang gihatag nila nga deadline? Husto ba nga among dawaton ang ilang tabang ug gub-on ang among mga balay bisan kun wa kami kasulatan nga gipirmahan uban kanila? Hinaut nga imo mi nga magiyahan kun unsay angayan namo nga buhaton.- Dencio
Dear Dencio,
Ang una ninyo’ng buhaton karon mao ang paghangyo sa kompaniya ug sa DWUP nga hatagan kamo og lugway sa ilang gihatag kaninyo nga tagal sa pagguba sa inyong panimalay ug sa pagbalhin sa relocation site. Mas maayo ‘sab nga magpatabang kamo sa inyong barangay aron maprotehean ang inyong interest. Kinahanglan ‘sab nga anaa g’yud mo’y kasabutan nga pinirmahan aron pagseguro nga ilang tumanon ang ilang saad nga financial assistance sa higayon nga moguba mo sa inyong mga balay. Para nako kun dili g’yud kamo ang tag-iya sa yuta, wa g’yud ta’y mahimo kun kuhaon na kini sa tag-iya. Mas maayo gani na kay naay gitanyag kaninyo nga relocation site dili sama sa uban nga wa g’yuy kabalhinan. Kun karon libon pa ang inyong relocation site ayaw mo kabalaka kay mamahimo man kamo nga magpatabang sa Cebu City government sa paglimpyo sa lugar ug sa pagbutang og suga ug tubig. At least kun inyong dawaton ang relocation site wala na g’yud unyay mo-demolish sa inyong pinuy-anan ug hingpit na g’yud kamo nga makaangkon og kaugalingong luna.- Atty. Divine