Klaro kaayo nga gipasagdan na lang karon sa kapolisan dinhi sa dakbayan sa Sugbo ubos sa pagdumala ni Senior Superintendent Noli Romana ang pagsiaw sa mga sugal sama sa video karera ug masiao.
Dili kay ang mga polis ra ang nagpaka-buta ug bungol niini’ng mao nga problema, kondili apil ang mga tanod sa lainlaing kabarangayan dinhi sa dakbayan.
Ang pagsakmit sa daghang video karera nga gihimo sa mga tanod sa Barangay Mabolo maoy magmatuod nga anam-anam nang mikatap sa kabarangayan ang mao nga sugal.
Duol sa Barangay Hall sa Pahina San Nicolas usa ka babaye nga giingon nga puyo-puyo og polis gikataho nga nag-operate og duha ka video karera, apan gilingiw-lingiwan lang kini sa mga polis ug tanod.
Usa ka informer gikan sa Pahina San Nicolas midayeg sa mga tanod sa Mabolo nga misakmit sa mga video karera nga gi-operate sa ilang barangay apan ang mga tanod sa Pahina San Nicolas gipasagdan ra ang pagkuyanap sa mao nga sugalan.
Adunay report nga sa Barangay Pasil ug Suba mikatap usab ang video karera samtang ang nabantayan nga wala gayud masumpo ang masiao nga gibase sa swertres.
Kun ang mayor hinuon aktibo nga mohimo’g kampanya aron masumpo ang pagkuyanap sa ilegal nga sugal mahimo gayud niya kay ang mga polis ubos man sa iyang operational control. Base sa Republic Act 8551 gilatid g’yud nga ang kampanya batok sa ilegal nga sugal anaa gipatong sa abaga sa mayor mao nga kun ang mayor supak sa ilegal nga sugal sa iyang dapit sayon ra kini nga mapuo.