Nakatilaw g’yud og leksyon ang PUJ driver nga si Stephen Doria kinsa nag-trip cutting kon wala molahos sa iyang rota ug gipakanaog ra ang iyang pasahero aron makabalik dayon siya ug makapamik-ap og laing pasahero.
Drayber si Doria sa PUJ nga magbiyahean sa rota nga Basak-Colon. Kaniadto’ng Miyerkules, alas 7:40 sa gabii, gipakanaog ra niya ang iyang pipila ka pasahero didto sa eskena Sanciangko ug Junquera.
Wala na siya mosubay sa gilatid nga rota nga moagi unta sa dalan Colon ug miliko ra siya sa Sanciangko gikan sa dalan Junquera.
Klaro kaayo nga ang iyang tumong pagliko sa Sanciangko aron makapasakay na usab og daghang pasahero kay nag-ilogay ang mga pasahero nga nagpaabot og kasakyan sa dalan Colon paingon sa Basak.
Ang iyang rota mosubay unta sa P. del Rosario, Junquera, ngadto sa Colon, liko sa tuo sa Mabini ngadto na sa Cathedral. Tungod sa iyang pag-trip cutting, usa niya ka pasahero nga babaye naghilak nga mitug-an kanako ug mao nga akong gidala ang isyu sa Land Transportation Office.
Si Aden Belza, administrative chief sa LTO-7 regional office, maoy mihimo sa hearing ug nahibaw-an nga si Doria nakalapas gayud sa lagda “failure to convey” nga ubos sa bag-ong lagda, P5,000 ang multa.
Gisakmit ang lisensya ni Doria ug iuli lang kini kaniya kun mabayran niya ang gilatid nga multa. Maayo unta kun kini nga isyu makatudlo ni Doria og leksyon ingon man sa uban pa nga mga drayber nga kusog kaayo mo-trip cutting.
Awhagon usab nako ang uban nga pasahero nga gihimoan og susama nga tinonto sa mga abusado nga drayber nga ayaw kahadlok, ireklamo ang pagbinuang kaninyo.
Kamo’ng mga PUJ driver, tumana ninyo ang inyong katungdanan aron dili kamo makatilaw sa dagko nga multahan. Malooy g’yud unta kita nga mopahamtang og multa, apan si Doria makadaghan na madakpi ug namultahan base sa rekord sa LTO.
Maayo unta kun ang pagpamulta kaniya makatudlo og leksyon nga dili na moabuso. Ang pagdala-dala ninyo og bata aron kamo kaloy-on, karaan na kana nga kansyon sa mga madakpan nga drayber.