Salawayon kaayo kun tinuod man ang mga pagduda nga midawat og kuwarta ang inahan niadto’ng bata nga giplasteran ang baba sa nurse sa Cebu Maternity House bugti sa pagsibog niya sa iyang reklamo.
Ang pagdiki-diki sa inahan sa bata pagpa-interview sa media aron unta iyang mapasabot kun unsa kadto’ng gipirmahan niya nga dukomento, kadudahan nga wala siya magtug-an sa matuod bisan og miingon kini nga mopadayon siya pagkab-ot og hustisya sa gihimo ngadto sa iyang anak.
Layo ra ang posibilidad nga ang tagdumala sa Maternity House naghimo-himo og dukomento nga sundogon ang pirma ni Jasmine Janice Badocdoc. Kun kini pa ang nahitabo, dili kaha mokisi-kisi na si Badocdoc ug moreklamo?
Bisan og katungod sa ginikanan ang paghukom kun moreklamo ba sila o dili sa gihimo ngadto sa ilang anak, apan makasaway kanila ang katawhan nga kusganon unta nga misuporta aron kasilotan ang miamong-among sa ilang bata.
Sila mismo nga ginikanan maoy mipakita sa sitwasyon sa ilang anak pinaagi sa hulagway nga gi-post nila sa internet kang kansang baba sa bata giplasteran ug nakabutang kadto sa peligro nga dili na makaginhawa ang bata kun nahitabo pa nga kini gisip-on.
Karon mapanagan-on na sila nga manubag sa pangutana sa mga sakop sa media nga mialalay kanila aron kahatagan og hustisya ang gihimo ngadto sa ilang anak. Adunay sugyot nga kun tinuod man ang pagduda nga nabayran ang inahan sa bata aron pagpahilom na kanila’ng magtiayon, mas labing maayo nga magpakuha usab sila’g hulagway nga gitaptapan ang ilang baba og papel de bangko ug i-post usab nila kini sa internet.