Ang kahoy gipatubo sa Dios aron makatabang sa pagpuyo sa tawo, apan usahay ang kahoy mopatay sa tawo.
Apan sakit kaayo palandungon, kay usahay way laing basulon sa tagtungod sa mamatay, kundili ang Dios nga maoy nagpatubo sa kahoy alang sa tawo.
Sa bahin sa taga Department of Public Works and Highways (DPWH) giila nila karon ang kamahinungdanon sa kahoy.
Kadaghan na sila mosuway sa pagluka sa kahoy gikan sa dapit nga maapektohan sa palapdan nga karsada apan nangamatay kini, ug kaso sa korte maoy ilang giatubang.
Busa gimandaran ni DPWH-7 Regional Director Ador Canlas ang iyang mga tawo nga dili na pahilabtan ang kahoy.
Kun kining mga kahoya maigo sa karsada nga palapdan, pasagdan nga ang karsada maoy ibalhin, nungka nga ang kahoy maoy laroton ug ibalhin.
Sama sa ilang gihimo sa mga karaang acasia sa daplin sa karsada tali sa mga dakbayan sa Carcar ug Naga diin gumikan kay mas gamhanan ang tingog sa taga Department of Environment and Natural Resources (DENR) nga tinugyanan sa pag-atiman sa mga kahoy, wala mahilabti sa DPWH ang maong mga acasia ug gipalihay na lang ang karsada.
Busa nahilom ang taga DENR ug ang mga tawo nga kaliwat sa nagtanom sa maong mga acasia sa dugay na nga panahon.
Apan ambot kaha, tungod kay dili kalikayan usahay nga mabali ang sanga sa kahoy, kun inigkabali niini mahagsa ug makaguba og sakyanan ug makapatay pa og tawo, kinsa may basulon ug papanubagon niini?
Ang DPWH ug DENR natural pulos manghunaw ug sa laktud wala’y manubag sa kadaot sa butang ug sa kinabuhi, ug aron maabswelto ang tanan, ingnon nalang “pagbuot sa Dios ang tanan”.
* * *