Angay'ng tinud-on sa mga tinugyanan sa Cebu City Hall nga gub-on gayud nila ang kabahin sa estraktura nga gitukod sa tagdumala sa Chong Hua Medical Arts nga milapas na ngadto sa Guadalupe River.
Anhi masukod sa katawhan kun unsa ang pagpatuman sa balaod sa kadagkoan sa dakbayan. Kun palabyon lang kini sa mga opisyal sa dakbayan sa Sugbo mahimo unya kini'ng basehanan.
Dili imposible nga ang tag-iya sa yuta sa pikas tampi sa sapa sa Guadalupe motukod usab og susama nga pagpalapad sa ilang estraktura nga makapagamay usab sa sapa.
Kun kini aksyonan na unya sa kagamhanan, ang mga opisyal mapasanginlan nga adunay gipinig sa pagpatuman nila sa balaod kun dili nila aksyonan ang gihimo sa tagdumala sa Chong Hua Medical Arts.
Ang gipalapdan nga bahin luyo sa building tipik kini sa parking area. Wala malilong sa katawhan nga ang lapad nga parking area atubangan sa Chong Hua Medical Arts ginegosyo g'yud pag-ayo.
Tag P15 ang bayad sa mga motorista sa kada oras nga pagparking nila sa sakyanan. Kun kaniadto libre lang ang pag-parking sa mga motorsiklo, karon giapil na nila sa 'tag P15 ang oras nga parking fee.
Daghan sa mga mata sa katawhan nagtutok karon sa lakang sa atong mga tinugyanan sa City Hall kun unsay himuon nila sa reklamo sa tag-iya sa atbang nga luna sa gipalapdan nga property. Asa ang palabihon sa mga opisyal sa dakbayan, ang ilang panagsuod o nga pasanginlan sila nga maayo lang mopatuman sa balaod sa dili nila amigo.