EDITORYAL - Bag-ong uniporme, bag-ong PNP?

Dise-siyete ka tuig na ang milabay dihang kataposang nag-ilis ang Philippine National Police sa desenyo sa ilang uniporme. Karon, aduna na say “new look” ang PNP.

Wa pa hinuon kini nahimong opisyal na nga bag-ong uniporme  kay magkinahanglan pa kini og pagtugot gikan sa National Police Commission, sa publiko ug gikan mismo sa mga sakop sa kapolisan.

Apan sama sa pag-ilis sa PNP gikan sa khaki uniform ngadto na sa blue uniform kaniadto miani kini dayon og pagsaway gikan sa katawhan ilabi na sa mga netizens.

Dunay mga misaway  tungod kay mas gihatagan pa kuno og importansya ang ilang hitsura nungka sa ilang performance.

Nagsaka ang mga krimen sa kadalanan, mga unsolved extra-judicial killings, media killings, kurapsyon, kalambigitan sa mga drug syndicates ug pagpangabuso sa tawhanong katungod sa mga inosente ug sa mga kriminal.

Siguro mas maayong gihatagan unta og mas dakong pagtagad ang pagsulbad  sa mga krimen inay nga ang ilang hitsura.

Ang reaksyon  natural lamang tungod kay miubos na man ang pagsalig sa katawhan sa atong kapolisan tungod sa kadaghan sa ilang  kapalpakan.

Unsa man diay ka-importante ang pag-ilis sa uniporme? Mausab ba niini ang naandan nang kinaiya sa mga polis?

Ang kaayohan lang niini mao nga malahi na ang  ilang hitsura sa mata sa mga tawo, apan ang kawalay pagsalig kanila magpabilin hangtud nga dili molihok ang mga tarong nga mga sakop sa maong organisasyon batok niadtong ilang mga nagpabadlong nga mga kauban.

 

Show comments