Siquijor – Nidalikyat ko og bisita niining maong dapit human sa dagha’ng katuigan. Wala nako kalimti ang Siquijor sa akong panumdoman isip usa sa labing nindot nga isla sa nasud. Ning bag-o lang, nalakip ang Siquijor sa napulo ka lalawigan sa nasud nga maayo’ng duawon sa mga turista tungod sa gitanyag niini nga mga atraksyon ug labaw sa tanan, ang wa’y paglubad nga kaayo sa mga tawo ni’ng maong dapit.
Human sa 10 ka tuig, nakaduaw ko og balik sa Siquijor ug subli’ng nakighimamat sa kaanyag sa iyang palibot ug nakigtagbo sa iyang mga tawo nga usa sa labing buotan ug matinahuron nga akong nasugatan.
Daghang kabag-ohan ang nisugat nako sa Siquijor. Ang kaniadto lubak-lubak ug gubaon nga da’n, karon aspaltado na ang tibuok national highway sa lalawigan. Gamit ang motorsiklo, nahuman nako og tuyok ang dapit su’d sa unom ka oras. Medyo dugay tungod kay sa pipila ka dapit nga gihunongan namo uban sa akong grupo naligo mi ug mikuha’g mga hulagway.
Ang kaniadto laksot nga karsada, karon nindot na ug tulin na’ng makapadagan ang mga motorsiklo ug mas sayon na lang sa mga lokal ug langyaw’ng turista ang pagbisita sa mga tourist attraction.
Ang mga karatola nga gibutang sa kilid sa da’n ang motultol sa mga turista sa pag-abot sa mga gipasigarbong atraksyon ning maong isla.
Gikan sa lungsod sa Larena, akong gisubay gamit ang motorsiklo ang mga lungsod sa Enrique Villanueva, Maria, Lazi, San Juan ug ang sentro sa pang-gobiyerno, ang lungsod sa Siquijor. Wa’ nako sipyata sa pagduaw ang nabantog nga Salagduong public beach.
Napuno sa mga tawo ang lugar. Layo ra itandi sa kataposan nako’ng pagduaw sa mao’ng dapit nga maihap lang sa tudlo ang mga tawo nga mohapit sa lugar.
Wala ‘sab nako sipyata ang pagpamasahe sa tiil sa mga gagmay’ng isda sa nabantog nga balete tree. Sukwahi sa giingon sa uban nga hadlok ang dapit, bugnaw nga tubig ug mingaw nga lugar ang imong masinati.
Dili kompleto ang biyahe sa Siquijor kung dili ka makaduaw sa sikat nga simbahan sa Lazi, ang usa sa labing karaan sa nasud ug gi-preserbar sa National Historical Commission. Sa atbang sa nabantog nga simbahan nahimutang ang dakong kombento nga kaniadto gihimong prisohan sa panahon sa mga Kastila.
Wala ‘sab namo kalimti ang pagkaligo sa public pool sa lungsod sa San Juan ug sa mga nindot nga waterfalls nga gawas nga limpyo, mas sayon ra nga tultolon ug abton sa mga bisita.
Daghang atraksyon ang gitanyag sa Siquijor nga daw imposible alang sa uban kansang kahadlok sa dapit mas nipatigbabaw.
Sukwahi sa pagtuo sa kadaghanan nga hadlok kining mao nga isla, wa’ kay laing masulti sa Siquijor gawas sa pagdayeg sa kinaiyahan ug sa kabuotan sa mga namuyo.
Gawas nga barato ang palaliton, mahimo ka nga mohunong kilid sa baybayon aron maligo sa tin-aw nga dagat. Daghan ang dapit nga landong nga mahimo nimong kapasilungan aron mahangyap ang mas presko nga hangin. Ang maong matang sa atraksyon, lisud na nga maangkon sa dagko nga mga siyudad sama sa Sugbo apan dinhi sa Siquijor, aduna pay daghang butang nga makapalipay apan libre nga maangkon.
Kini’ng bag-o nga kausaban sa Siquijor, mas nahatagan og gibug-aton sa kausaban sa dagan sa politika sa dapit. Human sa kapin duha ka dekada nga pamunoan sa pamilya Fua, karon bag-ong nawong sa politika ang ni-dominar sa lalawigan. Kun kaniadto, susamang bansagon ang nagpuli-puli sa paghupot sa mga dagko’ng posisyon sa kagamhanan, karon nabag-o ang dagway sa politika sa dapit nga posible’ng maoy rason ngano nga mas agresibo ‘sab ang mga tawo sa pakig-uban sa dagan sa kalamboan.
Ug kun mopatigbabaw lang ang kaalam sa mga tawo sa pagpili sa ilang tukma nga mga lider, hayan layo pa og maabtan ang isla sa Siquijor.
Sa police station sa lungsod sa Larena, nagmingaw ang ilang prisohan. Mas maayo na lang kun sa usa ka buwan, adunay mabilanggo sa maong dapit. Kini ang usa ka butang nga nakapalahi sa Siquijor itandi sa uban.
Likod sa pagsulbong sa ekonomiya ug pagtukod sa daghan nga world class resorts ug pag-abot sa mga lokal ug langyaw nga mga turista, nagpabilin ang Siquijior sa iyang kaanyag. Ug labaw sa tanan, nagpabilin ang iyang pagka-mahigugmaon sa kalinaw.
***
Email: ricolucena@yahoo.com or ricolucena@ilovecomarts.com