Dako’ng tinonto ang gihimo sa Black Pearl Security Agency nga midistino og mga guwardiya sa Kapitolyo ug sa uban pa nga mga opisina nga walay mga armas.
Midayeg kaayo ni Gobernador Hilario Davide III kay gitataw man g’yud niya nga dili siya modawat og suborno gikan sa mga supplier og mga produkto ug serbisyo ngadto sa Kapitolyo.
Apan ang imong mga sakop sir, wala kaha? Kun sa mga proyekto ang kontraktor mohatag g’yud og 10 ngadto sa 15 porsiyento nga komisyon sa mga nakatabang nga sila ang makakuha sa kontrata, sa security agency tag P500 ngadto sa P1,000 ang hatag nila sa matag guwardiya.
Dili ba gud tinuod? Kini maoy matngonan pag-ayo ni Gobernador Davide aron dili madaot ang iyang administrasyon. Apan ngano man nga ila ra man nga gitugotan nga walay armas ang mga gidistino nga guwardiya sa Kapitolyo?
Susama ra man kini sa gihimo sa tag-iya sa security agency nga nagserbisyo sa The Freeman nga kaniadto usa ra ka armas ang ilang giisyu alang sa upat ka gwardiya nga magdungan og duty.
Ambot karon, nagtarong na ba kaha kini’ng Filipinas Security Agency kay ang uban ra ba sa guwardiya nga ilang gidistino mireklamo nga giibanan sila og deductions apan wala ma-remit sama sa SSS.
Maayo unta og nagtinarong na kay amigo kaayo nako ang tag-iya niini nga si retired Colonel Hiram Benatiro.
Balikan nato ang isyu sa Black Pearl Security Agency nga giingon nga midestino og mga guwardiya nga walay armas, dakua ninyo og ganansya no? Mahimo man nga walay armas ang guwardiya nga idistino kun kini ang kagustohan sa tagkuha sa ilang serbisyo.
Apan ang kantidad sa kontrata sa mata’g guwardiya barato g’yud kun itandi sa mga guwardiya nga adunay armas. Kun mahal man gani gihapon ang kantidad, angay’ng susihon kini ni Gobernador Davide kay matikasan ang Kapitolyo niini ug posible nga adunay nakabulsa.
Sa mga opisina sa gobiyerno, pagkadaghan ra ba g’yud nga mga binuang. Aw, tan-awa ra gud ang gipang-aspalto nga karsada kun gihuman ba. Sagdi lang, una nga higayon nga ako mismo ang mo-file og kaso kun masuta nako nga gipirmahan ug gibayran na ang mga kontraktor nga bisan og wala humana ang proyekto.