Flyover sa Ayala, dalan Archbishop Reyes, may dwarf ramps. Inig padulong ug saka naa. Inig kanaog naa. Mokurog intawon ang lawas sa sakyanan. Hasta mga senior citizens nga sakay, mora’g misayaw’g kuratsa sa ilang lingkoranan. Usahay, postisong Lola mahulog pa! Ingon ini kakusog ang ug-og nga moayag sa nagdagang kotse nga moagi ning mga dwarf ramps. Pagka-wala’y kaluoy sa naghimo niini!
Sa tinuoray lang, makahayblad ang dwarf ramps. Halos tanang motorista misaway niini. Tiaw bay, inig tunob sa ligid ining dapita mora’g gigabas ang bolsa sa tag-iya sa sakyanan sa hait nga mga ngipon sa tumang konsimisyon. Imbes ang ligid nga molahutay pa unta’g duha ka tuig, mahimong usa na lang ka tuig nga mapuslan. Ang uban (labi na’g taksi), unom ka bulan pa lang, ilisan na’g bag-o. Kay kining dwarf ramps kusog kaayong mogaras-garas sa mga ligid. Pagka-wala’y kasingkasing sa nangamahan niining proyektoha! Para sa unsa ba gayod kining giladlad sa dalan ug flyover nga dwarf ramps? Para ba sa kaayohan sa mga motorista, o para sa kaalaotan sa may mga sakyanan?
Matud pa ni Mr. Dy, segun sa iyang nahibaw-an, ang tumong ining gigamang dwarf ramps aron kuno ang hingatulgon nga drayber makamata ug maalerto. Mao ba? Unya, ngano man nga kanang dwarf ramps atubangan sa Capitol Parish Church, daghan na man laging behikulo ug kinabuhi nga nangadisgrasiya? Niini lang bag-o, kining tagsulat nakakita gyud nga gitabang sa duroha ka nagmotorsiklo ang usa ka tigulang lalaki nga kalit lang natakilpo ug wa na makabangon pag-agi sa dwarf ramps. Buhing pruyba, nga kining dwarf ramps nga gihimo sa gobiyerno, usa ka grabeng pag-among-among sa kinabuhi sa mga sakyanan ug katawhan.
Miingon sila nga ang dwarf ramps makapapugos sa pagpahinay sa pagpadagan? Diha sila nasayop. Kay kun moagi ka sa dwarf ramps nga hinay imong dagan, mora’g gilinog ang sulod sa imong sakyanan. Haskang sabaa sa mga lingkoranan? Lakip rear mirror, matagak pa! Mao nga mapugos gyud pagpakusog ang mga drayber sa pagpadagan. Kay minus ang rattle...ug tul-id kaayo ang dagan.
DPWH, hunong na intawon ning pagsige ninyo’g among-among namo, uy! Panguhaa na ning mga destructive dwarf ramps, bi!