Tingali nakamatngon kamo usahay nga adunay orasan nga puwerhisyo kaayo nga usahay atong tawgon og relo de pasmo kay kanunay man kini dili kahatag og tukma nga oras sa panahon. Kay naandan na man nato nga gisunod ang standard nga orasan (12 oras sa adlaw ug 12 oras sa gabii). Kun dunay orasan panahon sa gabii ug adlaw sulod sa 24 oras, mao usab ang orasan sa tingkaon. Gani lang lahi ang kamada niini, tag-unom ka oras. Pamahaw (6 am) paniudto (12nn) panihapon (6 pm). Apan may lain pa nga importante kaayo mao ang orasan sa kahimsog.
Lahi pud ang han-ay niini kay gibahin og katulo ang 24 ka oras sa atong himsog nga aktibidades.
Ang unang 8 oras gigahin alang sa pagtrabaho o pagsikaysikay. Ang ikaduha’ng 8 oras gigahin alang sa katilingbanong pakigsandurot. Ang ikatulo’ng 8 oras gigahin usab alang sa pagkatulog. Mao kini ang husto’ng orasan kun buot tang mohimsog. Apan sagad sa atong naobserbahan kanunay kini palyado o maguba kay dili man hingpit mapasunod tungod sa daghang hinungdan. Ang uban halos hutdon na lang ang tanang oras sa pagtrabaho, nga kulang sa katulog kay lagi nangyawat apan nangasakit hinoon.
Aduna say uban kanunay na lang matulog dili ganahan motrabaho. Ang uban pud, anaa na lang permi sa kalingawan o mga bisyo nga way pagkabana sa panahon nga nakaguba sa orasan sa maayong panglawas. Naa pa gyud, nga ang uban gihimo nga adlaw ang gabii. Nakahibalo na kita kun unsay ikaayo sa atong lawas, lamang kompyansa kaayo kita kay tingali nagsalig nga madala pa og agwanta. Kay ang atong mentalidad nakasandig man gud sa pagtoo nga samtang batan-on pahimuslan.