Dear Atty. Divine:
Duna koy pangutana labot sa property nga gusto unta nako nga paliton. Patay na ang original owner niini ug usa sa iyang mga anak ang mitanyag nga ilang ibaligya kanako ang property kay kasikbit ra man sab sa akong yuta. Interesado ko nga mopalit sa yuta apan wa kini title kondili tax declaration lang. Ang akong panguta attorney kun okey ra ba paliton ang yuta bisan kun tax dec lang? Unsa nga dokumento ang akong pangayuon gikan kanilang mga heirs? Hinaut nga imo kong magiyahan niining tanan. — Letty
Dear Letty,
Sa dili pa nimo paliton ang yuta, mas maayo nga mangayo ka daan og kopya sa latest tax declaration kun kinsa gyud ang declared owner niini. Kun gusto ka nga maneguro mamahimo sab nga imong i-check sa Register of Deeds kun aduna bay titulo nga gi-issue niini ngadto sa laing tawo. Kun imong masuta nga limpyo ang tax dec ug ubang papeles sa yuta, mamahimo kini nimong paliton. Ang mga heirs sa maong yuta maoy mo-execute og Extrajudicial Partition with Sale in your favor. Kinahanglan ang tanang heirs nakapirma niini. Mangayo sab ka daan nila og certified true copy sa tax declaration ug tax clearance kay imo man kining gamiton atul sa pag-transfer unya sa maong property. Hinaut nga akong natubag ang imong mga pangutana. Daghang salamat. — Atty. Divine
Kun ikaw adunay pangutana may kalabutan sa problemang legal, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.