Bisan nakaplagan sa pagtuon sa Department of Science and Technology (DOST) nga di masabtan sa kinabag-an sa katawhan ang ilang banabana sa kahimtang sa panahon, way kausaban nga nahitabo sa mga pahibawo sa Philippine Atmospheric, Geophysical and Astronomical Services Administration (Pagasa). Hinaot nga tungod lang ni sa kahinay nilang mousab sa unsay naandan ug di tungod kay way bilib ang mga tagduma sa Pagasa sa ilang inahang buhatan.
Way nakugang sa sangpotanan sa pagtuon sa DOST. Sud na ron sa daghan uyamot nga katuigan nga nagbagulbol ang publiko sa kalisod sabton sa weather forecasts. Ug ang Pagasa nagpaugat pagpadayon pagsumay-sumay sa bisan unsay ilawog sa ilang ulohang buhatan.
* * *
Gawas ni Direktor Oscar Tabada sa Pagasa Visayas. Kinsa napamatud-an sa nangaging katalagman nga mas tin-aw ug mas takos kay sa iyang mga labaw pagpasabot sa kahimtang sa panahon. Gani nilampos si Tabada pagkumbinser sa kadagkoan sa DOST pagbutang og dugang kahimanan sa nagkalainlaing rehiyon aron nga ang lokal nga mga buhatan sa Pagasa makahimo sa ilang kaugalingong forecasts.
Apan ang influencia ni Tabada wa makausab sa nangalisbo nga sistema sa Pagasa: Ilang ulohang buhatan maoy mosuwat sa forecast, pinasikad sa kasayuran nga nahipos sa doppler radar sa Mactan ug sa ubang rehiyon, nga igo lang gihubad sa forecasters nga ang uban klarong wa kasabot sa ilang gibasa.
* * *
Suwayi ra gud masabtan ba ning forecast nga gipagawas sa Pagasa samtang nagsuwat ko ning lindog: “The entire archipelago will have partly cloudy to cloudy skies with isolated rainshowers or thunderstorms mostly in the afternoon or evening. Moderate to occasionally strong winds from the east will prevail over eastern section of Southern Luzon, Visayas and Mindanao and the coastal waters along these areas will be moderate to occasionally rough. Elsewhere, winds will be light to moderate coming from the east to northeast with slight to moderate seas.â€
Wa hisguti nganong labihang alimuota. Nagpasidaan hinuon og uwan nga wa moabot.
* * *
Nitanyag ang ilang website (pagasa.gov.ph) sa kahulogan sa mga termino paghulagway sa kalangitan: clear, partly cloudy, at times cloudy, mostly cloudy, cloudy ug overcast. Nga mas naglibog kay pulos naglakip sa ihap sa okta. Nga segun sa Wikipedia, nga akong gidangpan kay wa hisguti sa Pagasa, maoy sukod sa panganod.
Nitanyag sang website sa banabana sa panahon sa pinili nga mga dakbayan sa Pilipinas. Giapil ang mga dakbayan sa Tagbilaran sa Bohol ug Dumaguete sa Negros Oriental apan gilaktawan nilang Sugbo. Makalili hinuon ka sa kahimtang sa panahon sa Metro Cebu kon matsambahan ang gitago nga PDF page. Sa laktod, ang forecast gihimo sa Pagasa sa pinulongan nga pila ra nilay makasabot ug gimantala sa paagi nga sila ray makatultol.
* * *