Aduna na’y mga tinun-an nga first batch sa mga Cebu City Scholars nga mo-graduate na sa ilang mga kurso apan nagpabilin nga wala makadawat sa gisaad kanila nga school supply allowance gikan sa kagamhanan sa dakbayan.
Ang mata’g college scholar makadawat unta og ‘tag P1,000 kada semester nga school supply allowance apan wala ihatag ang kantidad bisan og giaprobahan sa Cebu City Council ang tanan nga scholarship budget nga gisugyot ni Mayor Michael Rama.
Law-ay kaayo pamation nga sa kampanya sa eleksyon ang mga kandidato kusog kaayo mopagarpar ug mipasalig pa nga pausbawan nila ang school supply allowance sa mga scholars kun sila mapili apan karon nga na-elected na wala na magtagad.
Ang mga opisyal sa City Hall kun pangutan-on sa kapakyas nila paghatag sa gisaad nga school supply allowance daghan kaayo og tubag apan pulos mga baliko ang ilang rason.
Kun duol pa tingali ang sunod eleksyon, daghan nga mga opisyal ang mohatag og pagtagad niini aron mahimo sila nga humot ngadto sa mga tinun-an ug sila botohan. Apan kay layo pa man ang eleksyon wala’y nagpakabana kanila.
Bisan si Konsehal Noel Wenceslao nga maoy tsirman sa Committee on Education sa City Council wala’y gihimo aron ang administrasyon ni Mayor Rama mapugos pagtuman sa iyang gisaad.
Ang mga tinun-an angay na nga mahigmata ug makasabot nga gilingla lang sila sa mga opisyal. Abi kay anaa na man sila sa pwesto gikalimtan na ang ilang mga saad.