Ipakita ta ang panag-igsuonay

Sa dili pa iisa ang Kordero sa Diyos aron agdahon ang katawhan sa pagpakigsandurot-apil og kaon sa dakong bangkete nga giandam ibabaw sa sagradong altar panahon sa Eyukarestiya, ipalanog sa pari ang pag-awhag sa tanang manimbahay nga: “Ipakita ta ang panag-igsuonay.”

Langitnong awhag sa panaghinigugmaay matag usa dili lang kutob sa pulong: kun dili, hasta sab sa buhat. Mao man gani, nga sa pagyahat ug pagyangoyango ta diha sa masig nato ka tupad, moingon gyud ta: “Peace! O, kalinaw!” Kay kun naay Peace naa ang gugma. Ug kun naay gugma naa pud ang Peace. Sa laktod, kun naay Peace and Love, kitang tanan magkahiusa, magtinabangay ug magkaloy-anay sa bisan unsang matang sa dagway sa panahon nga moabot sa atong kinabuhi.

Apan subo kaayong sud-ongon, nga diha pa lang sa akto sa Misa, diin moingon ang pari: “Ipakita ta ang panag-igsuonay,” halos tanang manimbahay mamili kinsa ray iyang tagdon. Sagad ila ra gyung uyab nga naa sa tupad. Sagad ila ra gyung pamilya nga naa sa isig ka kilid. Maghinagkanay pa!

Okey ra man unta nang maghinagkanay sa nawong sa atong close relatives, basta di lang sab ta magdinawo paghatag sa atong genuine smile ngadto sa tanang manimbahay nga maabot sa atong pagtimbaya ug pagyangoyango. Ang pait, kay duna gyu’y mga tawo nga kutob ra gyud sa ilang minahal nga tupad ang ilang pahiyom, gakos ug bisobiso. Mura bitaw’g wala na sila’y laing nakita. Kay bisan unsaon nimo’g smile, mora gyu’g buta. Nagtutok sa layo! Maayo ba?

Bitaw, mga igsuon kong Romano Katoliko, usbon na nato ning matanga sa kinaiya. Sa akto sa ‘ipakita ta ang Panag-igsuonay,’ nindot tingali ipabuhagay ta ang tiunay natong pagtimbaya ngadto gyud sa tanan. Di ta mamili. Kun mahimo, tuyok ta sa atong gibarogan aron hasta ang naa sa likod atong maapil sa pagtagad. Kuwaresma na baya. Panahon sa pagbag-o. Ug sugdan ta kini dinhi: “Sa Ipakita ta ang Panag-igsuonay.”