Daghang national road nga gasang-gasangon na kaayo ug mag-untol-untol na gani ang mga moagi nga sakyanan apan wala kini unaha pag-aspalto sa Department of Public Works and Highways (DPWH).
Nakapangutana g’yud ang mga magbubuhis kun ngano nga adunay ubang karsada nga pwerte pa nga nindota, hamis pa kaayo sama sa M. C. Briones Street kilid sa Cebu City Hall, apan giaspalto na usab, ug giuna pa nila pagtrabaho.
Bisan ang mga opisyal sa City Hall natingala pag-ayo dihang gikaskas na ang sinaw kaayo nga karsada. Giaspalto kini paglabay sa duha ka adlaw. Unsay tumong niini? Aron daygon ang DPWH sa mayor?
Ang V. Rama Avenue usa ka national road, apan nganong wala man kini aspaltoha pag-una sa DPWH nga unta gasang-gasangon na man kaayo ang mao nga karsada? Dili ba maayo nga kadto unta maoy giuna?
Klaro man kaayo nga daghang karsada nga kun tan-awon nimo ang “category†dili unta maisip nga “priority†apan mao man ang giuna pagtrabaho.
Daghan na ba g’yud kaayo’g kwarta ang DPWH para sa proyekto? Dili nato mabasol ang mga yano nga katawhan kun magduda sila nga ang mga opisyal sa DPWH nangita ra g’yud og proyekto nga kagastohan sa kwarta para dunay komisyon.
Ang mga national road nga bati na kaayo maoy unahon bisan og tua pa kini mahimutang sa hilit nga dapit ug dili kadtong nindot pa aron lang g’yud makita nga dunay proyekto ang DPWH.
Unsa may ilang utok?
Ni Wen Celen
Abi tingale sa mga doctor ug uban pang professional nga banga lang gihapon ang BIR nga way listahan sa ilang ngan. Kinsa kaha kining maong doktor nga taga Cebu ug taga Davao nga tag P20 ray buhis nga gibayran niadtong 2012?
Pagka-dako bayang tamparos niini ngadto sa kagamhanan, kinsa mao na sa ginhawang paningil og buhis sa tanang kawani sa gobiyerno ug pribadong kompaniya aron makahipos og buhis.
Nagtuo man gud kining maong mga propesyonal nga sama pa sa panahon ni Magellan ang BIR karon, nga mahimo ra nilang lipaton aron di masayud sa ilang kinitaan.
Tinuod gumikan tingale sa kahuyang sa sukdanan sa BIR nga resibo ray tamdan nila sa usa ka buhatan sa professional, busa kun mokita kini og P1 million, unya usa ra ka libo ka pesos ang imarka niini sa ilang official receipt, aw puwerting lipata sa BIR.
Kay ngano, wa na diay laing sistema ang maong ahensya aron sayron ang matag kinitaan sa mga professional?
* * *
Daghan diay ang nagplano nga molansar pagka-presidente sa nasud sa piniliay sa 2016.
Di pa nganlan sa Espada ang maong mga kandidato apan apil man kuno diay bisan kadtong nalambigit sa P10 billion pork barrel fund scam.
Kondisyunon na lang nato ang atong kaugalingon nga sa matag karon ug unya kauban sa atong mapili ang mga kawatan. Apan maayo unta kun makapili kita og mga kandidato nga “di kaayo†kawatan ug kaantigo mobantay ug mogukod sa mga opisyal nga kawatan.
* * *
Kaniadto sa dinhi pa sa nasud ang mga base militar sa Amerikano, gipapahawa aron kuno “di kuyaw ang Pilipinas nga sulngon sa ubang nasudâ€.
Karon nga wa na ang Amerikano gusto sa mga tarong og hunahuna nga pabalikon sila tungod kay gihulga na ang Pilipinas sa China.
Apan niay mga magbabalaod nga gusto nga di na gyud pabalikon ang Amerikano dinhi sa nasud tungod sa mao gihapong katarungan nga kuyaw kuno kun sulngon sa ubang nasud ang Pilipinas.
Gusto pa gani sila nga mawagtang ang “mutual defense agreement tali sa US ug Pilipinasâ€.
Unsa man diay utok niining mga tawhana?
* * *