Nangayo og pasaylo si Presidente Benigno Aquino III sa katawhan ilabi na sa taga Tacloban City tungod sa nagmika nilang aksyon dihang gikumot ang Central Philippines sa super typhoon Yolanda sa miaging tuig.
Tungod sa maong trahedya nakita ang grabe kadako sa kakulangon sa Pilipinas sa pagresponde sa mga katalagman, bisan pa og nasayod na ang gobiyerno nga agianan gyud ang nasud sa mga bagyo kada tuig.
Unta sa baynte ka bagyo kada tuig nga mikuso-kuso sa nasud sa nanglabay’ng mga dekada duna na unta’y konkretong sistema pagtubag sa mga panginahanglan sa mga maapektahang lugar.
Di kwestyon kung asa mokuha og pundo aron ipalit sa mga gamit ug uban pang gikinahanglang kahimanan, ang kwestyon, mao ang “political will†sa mga nangaging presidente.
Ang pag-invest sa nasud alang sa disaster mitigation ug disaster preparedness dili angayang kwentahon kay kini dako og matabang pagsalbar sa mga kinabuhi ug sa kabtangan nga gipundar dili lang sa mga tawo kondili hasta mga imprastraktura sa gobiyerno.
Samtang dako ang pasalamat sa katawhang Filipino sa international community, dili lang unta kutob didto ang himuon. Higayon kadto nga kopyahon ang ilang sistema ug mga pamaagi kun unsaon ang hustong pagpangandam ug pagresponde aron kamenusan ang epekto sa katalagman.
Ang pagpangayo og pasaylo ni Aquino sa kahinay sa reaksyon sa trahedya, dili lang unta kutob na lang sa ‘sorry’ ug pagpangrason ug pagpamasol sa uban.
Mas maayo kun duna nay kongkretong pagpangandam gikan sa mga kahimanan, sistema, ug proseso nga dili na makapadugang pa sa kasakit nga gibati sa mga apektadong katawhan.