Mipadala kanako og text message ang hepe sa City Hall clearing team kaniadtong Lunes sa gabii nga mora’g nagpasigarbo nga natul-id na g’yud niya ang hiwi nga binuhatan sa taga Warwick-Barracks nga gihimo’ng pinuy-anan ang merkado.
Una, nalipay ko nga nakadawat sa mensahe. Akong gitimbang-timbang ang giingon ni Arce nga natuman niya ang kamandoan ni Mayor Michael Rama nga “tul-iron ang hiwi.†Apan nakapahiyom ko kay kun wala pa’y sunog nga nahitabo sa Warwick-Barracks, tingali nagpabilin nga wala mahilabti ang mao nga mga molupyo.
Maghuwat pa tingali ang mga sakop sa PROBE kon Prevention, Restoration Order and Beautification Enhancement nga masunog ang mga tindahan nga miukopar sa dalan Legaspi duol sa Santo Niño Barangay Hall usa sila moaksyon paghawan sa mao nga dapit?
Unsa man g’yuy hinungdan nga nagpanuko man ang PROBE sa paghawan sa mao nga dapit? Malooy ko sa mga kabus nga nagpakabuhi pinaagi sa pagpaninda kay pobre ‘sab tawon ko.
Apan dili na usab tukma nga ang aseras nga gitagana alang unta sa mga tawo, gitukoran nila og tindahan, unya miukopar pa gayud sila sa karsada. Aw kun tarong kamo og huna-huna, sigurado nga managsama kita og baruganan.
Hagit nako ni Raquel Arce nga himoon niya ang iyang trabaho unya dili masuko kun hisgotan ang ilang mga palpak. Nalipay ko pagkadawat sa text message ni Raquel sa miaging gabii kay ang kanhi nako “suod nga amiga†wala na gayud motubag pa sa akong mga tawag og text messages dihang nakahisgot ko og kabahin sa isyu sa merkado.
Ang maayo sa mga opisyal sa kagamhanan nga motubag ra sa isyu dili kay molikay-likay nga dili na motubag sa tawag sa tigbalita o kulumnista nga naghisgot sa isyu nga naglambigit sa ilang opisina.
Sagdi lang, mohisgot ra unya ta kabahin sa kamerkadohan kay nagplano ko nga magbutang og segment sa Banat News nga magtuki sa isyu sa mga merkado.
* * *
Kini bitaw nga mga kawani sa City Hall nga dili motambong sa flag-raising ceremony angay nga silotan. Ingon ana man g’yud basta motrabaho ta sa kagamhanan, pagsugod sa unang adlaw sa semana duna may flag-raising ceremony. Kun dili mo gusto nga motambong, ayaw na lang pagtrabaho sa gobiyerno. Total, sa inyong mga kwalipikasyon daghan man kaayo nga mag-apas sa mga pribado nga kompaniya.
Unya, daghan tinood sa mga kawani sa City Hall nga panahon sa flag-raising, anaa tuod apan nagsigi lang og text-text. Angay sila nga silotan kay walay respeto sa atong simbolo sa nasud.