US mas mitahod sa Dalai Lama kay sa China Ang usa ka lider may hiyas sa pagplano alang sa kaayohan sa mga tawo nga iyang gipangunahan.
Di siya tanga ilabi na kun ang iyang lugar nga nahimutangan anaa ubos sa impluwensya sa mga kriminal.
Di ba ingon niini ang atong kahimtang karon? Maglakaw ka sa mingaw nga lugar mabalaka ka kay kalit lang motumaw ang tulisan. Matang sa mga tawo nga kasagaran ubos usab sa impluwensya sa gidili nga drugas?
Anaa ka sa lugar nga daghang tawo sama sa sakyanan, takulahaw lang nga dul-itan ka og armas dayon tulison? O kaha diha-diha patyon? Busa ang usa ka lider karong panahuna di lang igo nga maayo moplano alang sa kaugmaran sa mga proyekto sa panginabuhi ug ekonomiya sa iyang lugar.
Kundi usa siya ka lider nga kaantigo moprotiher sa kinabuhi sa iyang mga konstituwente ilabi na kun gihulga kini sa mga kriminal. Busa “Ang Espada†mosaludo kang Mayor Valdemar Chiong sa dakbayan sa Naga kinsa miumol og kaugalingong SWAT aron isanta sa mga kriminal nga buot modaugdaog sa iyang mga konstituwente.
* * *
Matag adlaw daghang nalambigit sa pork barrel fund scam nga buot mopresentar isip state witness sa labing dako nga tulis sa kuwarta sa mga magbubuhis pinaagi sa mga inila nga opisyal sa kagamhanan. Kini tungod kay nasuta nila nga kun gagmay sila og ranggo, sigurado nga adto sila matiguwang o kaha mamatay sud sa prisohan. Nasuta nga ang kasong plunder, bug-at nga kaso nga di kapiyansahan, busa kaanugon sa imong natulis nga minilyon ka pesos nga salapi sa kagamhanan kun di nimo kini mapahimuslan sa gawasnong paagi.
Hinuon kun ang imong pagbali pabor sa kagamhanan mahimo tingale nga makalingkawas ka gikan sa bug-at nga silot
Apan ang pangutana kun ang imong iduot nga opisyal di ba kaha mangita og paagi nga ilakip ka niya sa bug-at nga silot nga iya unyang antuson o kaha ikaw ray iduot aron siya mahimong gawasnon.
* * *
Wa magpadiktar ang US sa China bahin sa isyu ni Dalai Lama. Gani gitakda ni Presidente Obama sa US nga makigtagbo siya sa respetadong lider sa Tibetan nga si Dalai Lama karong Biyernes. Butang nga nakapatingkag sa dunggan sa China ug nakapasamaot sa kasuko niini batok sa US, nga giisip nga pagpanghilabot sa ilang katungod. Nahinumdom ang China sa tuig 2011 dihang gihimo usab sa US ang susamang tratamento sa tawo nga gidumtan sa China sa tibuok niining kinabuhi.
Apan alang kang Obama, mas respetohan niini ang katungod ni Dalai Lama, kay sa hulga sa China kinsa giila karon sa kalibotan nga maoy super power sa natad sa ekonomiya ug sa armas de gira.