Gihatagan sa Department of Public Works and Highways (DPWH) og dugang lugway ang kontraktor pagtiwas sa nalangay nang pagpalapad sa circumferential road sa isla sa Mactan. Kasaligang tinubdan sa DPWH 7 nitug-an sa DYAB Radyo Patrol nga niadtong Pebrero 14 ning tuiga napupos ang higayon nga gihatag sa kontraktor ubos sa kontrata nga iyang gipirmahan human nakadaog sa subasta.
Dihang gisusi sa DPWH ang aktuwal nga dagan sa trabaho sa niaging buwan, kapin sa 60% pa ang nahuman sa kontraktor. Kinsa nipasalig nga mas paspas na ang ilang trabaho karon kay mas maayo nang kahimtang sa panahon ug nga mahuman na nila ang proyekto karong Marso karong tuiga.
* * *
Naglibog ko kinsay tinuod nga kontraktor sa proyekto, labi na ning bahin sa Mactan, Marigondon ug Maribago nga nakahasol pag-ayo sa mga motorista. Duha ang giila ni Lapu-Lapu City Mayor Paz Radaza: Ang Venray Construction ug ang Oaminal Construction. Apan segun sa among tinubdan ang Oaminal Construction ra maoy naproblema.
Maong nagpalaban ko sa website sa DPWH (dpwh.gov.ph). Nga nilista sa mosunod nga mga kontraktor sa nagkalainlaing bahin sa P3.7 bilyones nga 26 ka kilometro nga dan: Gowil Builders, QM Builders, Oscar R. Sarmiento Construction Inc., WTG Construction and Development Corporation ug Monolithic Construction and Concrete Products Inc.
* * *
Among tinubdan sa DPWH 7 wa kapasabot nganong wa maapil ang Oaminal sa listahan sa mga kontraktor sa ilang website. Wa sab siya’y kasayuran diin kuhaa ni Mayor Radaza ang ngan sa Venray.
Apan beteranong kontraktor nihatag namo og posibleng katin-awan: Naandan nilang mga kontraktor ang pag-subcontract sa dagko nilang mga trabaho ngadto sa mas gagmay’ng kontraktor, labi na naggapos nang ilang mga ekipo ug mga inhinyero sa mas dagkong mga proyekto sa gobyerno ug pribadong sektor. Among tinubdan way kasayuran kun igo ba lang gi-subcontract ang nabulilyaso na pag-ayo nga proyekto.
* * *
Nakadawat mi og makahasol nga kasayuran mahitungod sa kontraktor nga ang kinatibuk-ang ngan, Henry S. Oaminal Construction and General Merchandise, ug gituohang nagbase sa Misamis Occidental. Niadtong 2008, nagkahiusa silang anhing gobernador Erico Aumentado ug ang tulo ka kongresista sa Bohol nga silang (karon Gobernador) Edgar Chatto, Roberto Cajes ug Adam Relson Jala pag-awhag sa DPWH nga i-blacklist ang kontraktor tungod sa kalangay sa Catigbian-Sagbayan Road, Junction Loay Interior Road ug Carmen-Sagbayan-Bacane Road.
Gipasanginlan sab nila ang kontraktor nga gi-blacklist sa National Economic and Development Authority (Neda) tungod sa kuwestiyonableng trabaho sa building sa Neda 7 sa Sugbo. Wa mi kasayuran unsay gihimo sa DPWH sa mga reklamo batok sa Oaminal Construction. Labaw nang wa mi kasayuran nganong bisan sa kaseryuso sa mga pasangil nakakuha man og laing proyekto sa Sugbo.
* * *