Sa gipangayong umento sa suholan sa mga mamumuo, allowance lang ang gihatag sa mga sakop sa Regional Tripartite Wages and Productivity Board dinhi sa rehiyon 7. Bisan sa allowance, gipili lang ang gihatagan tungod kay wala iapil ang mga mamumuo sa mga dapit nga naigo sa bagyo ug linog.
Ang mga mamumuo sa dapit nga naigo sa linog ug bagyo wala iapil sa paghatag og allowance tungod kay ang ilang mga amo anaa pa sa recovery stage. Pagkaluoy sa mga mamumuo.
Kung sakyan nato ang argumento sa mga representante sa gobyerno ug employer nga naglingkod sa Regional Tripartite Wages and Productivity Board mura’g sila lang ang naapektohan sa bagyo ug linog. Mura’g para kanila sila lang ang naigo sa linog ug bagyo ug gilikayan sa nahisgotang kalamidad ang mga mamumuo.
Mga hakog ang mga representante sa gobyerno ug employer. Tungod sa ilang ka hakog bisan unsa na lang ang ilang girason sa dili paghatag og umento sa suholan sa mga mamumuo ug sa pagpili sa mga dapit nga makadawat sa 13 pesos nga Cost of Living Allowance.
Sa paglambo sa ekonomiya nga gipanghambog sa gobiyerno dili na ba lang diay gyud ta nila bahinan pinaagi sa paghatag og umento sa suholan sa mga mamumuo? Solohon na ba lang gyud diay nila ang kaayohan nga ikahatag sa giingong milambo nga ekonomiya?
Ang mga representante sa gobyerno sa paghatag og pabor ngadto sa mga employer mibaliwala sa iya mismong panghambog nga miasenso na ang ekonomiya sa nasud kay mipalabi sa ilang pagkahakog ug gikalimtan ang mga mamumuo nga mao ang dugokan sa milambo nga ekonomiya.