Ang mga opisyal sa dakbayan sa Sugbo mipahibalo nga sugod Marso 1 hugtan na g’yud nila ang pagpatuman sa balaod kabahin sa tukma nga paghipos sa mga basura.
Dili na hakoton kadtong mga basura nga wala gi-segregate kun wala gibuwag ang mga sagbot nga madugta ug kadtong dili madunot.
Kun tinud-on g’yud sa mga opisyal ang pagpatuman sa Republic Act 9003 kon Ecological Solid Waste Management Act, daghan g’yud ang madakpan.
Pananglit dili man masakpan kadtong molabay og mga basura nga wala gilain og sudlanan ang madugta ug kadtong dili malata, masakripisyo ang katawhan kun tinud-on nga dili na hakoton ang mao nga mga basura.
Ang mga opisyal sa kabarangayan ug dakbayan mapasakaan og kaso kun dili nila estrikto nga ipatuman ang mga lagda sa tukma nga paghipos sa mga basura.
Ang mga opisyal sa dakbayan misuway na kaniadto’ng 2004 sa estrikto nga pagpatuman sa balaod. Gikiha gani sa dakbayan ang usa ka kapitan sa barangay nga napakyas pagpatuman sa balaod.
Apan sa ngadto-ngadto milugak ang kampanya sa mga opisyal sa dakbayan ug kabarangayan tungod sa klaro kaayo nga rason – ang politika.
Kun hugtan nila pagpanakop ang mga tawo nga wala motuman sa balaod, maghambin kini og kasuko ug hayan dili na mobotar kanila sunod nga eleksyon.
Apan nganong mahadlok man? Nalimot ba kamo nga sa inyong pagpanumpa sa katungdanan inyo man nga gisaad nga ipatuman ninyo ang balaod sa wala’y kukahadlok ug wala’y pagpinig?