Usa sa nakapakumbinser ni Ruby Tuason sa kangil-ad sa mga implikasyon sa pagkalambigit sa iyang ngan sa multi-bilyones pesos nga pork barrel ug Malampaya scandals mao ang paghunong na sa iyang mga higala pag-text niya. Nikumpisal si Tuason nga nahugno pag-ayo siya nga nagmingaw ang iyang cell phone sa niaging pagsaulog sa Pasko ug Bag-ong Tuig.
Kun nitalikod bisan ang labing suod niyang mga higala, nalisang si Tuason nga naghunahuna unsay dangatan sa iyang mga apo. Kun magkapuliki na og panagang sa mga pangutana nganong nakaako ang ilang apohan pagpanghilabot sa dakong kuwarta sa gobyerno nga alang unta sa labing kabos ug labing nagkinahanglan nga mga Pilipinhon?
* * *
Nakadani sa akong pagtagad kining pabuhagay ni Tuason kay nitakdo ni sa sulti sa usa ka Sugbuanong kongresista. Nga dihang unang niulbo ang eskandalo sa pork barrel sa niaging tuig wa na siya ganahi nga mogawas sa iyang pinuy-anan. Kay bisan sa mga kan-anan sa Manila lain ang tinan-awan sa mga tawo pagkahibawo nga sakop siya sa Kongreso.
Wa maapil ang iyang ngan sa nagkataas nga listahan sa mga nahilambigit sa mga transaksiyon ug peke nga mga organisasyon ni Janet Napoles. Apan nabatyagan gihapon niya nga mas hait nga tinan-awan sa mga magbubuhis bisan nia siya sa Sugbo.
* * *
Pinasikad sa kumpisal ni Tuason ug sa Sugbuanong kongresista nakaamgo ko nga di diay inutil ang katawhan batok sa pangurakot ug pahimus sa katungdanan sa mga opisyal sa gobyerno. Bisan unsa kadagko ug kagamhanan sa mga opisyal nga gilambigit sa mga eskandalo kita diay gihapon nga kasarangang katawhan maoy naghupot sa tanang alas.
Di ta kinahanglan nga mobarikada sa ilang mga buhatan. Di gani ta kinahanglan nga mamutang og placards sa ilang mga agianan. Di ta kinahanglan nga manghipos og mga ebidensiya ug mopasaka og mga kaso sa hukmanan. Bugtong gikinahanglan mao ang pagpakabana, pagpakisayod, pagsubay sa mga panghitabo ug pagreserba sa kinakusgan natong mga tinan-awan ngadto sa mga gilambigit.
* * *
Karon pa lang ila-ilahon na nato ang mga dagway ning mga kongresista, mga senador, mga gobernador, mga mayor ug ubang mga haligi sa gobyerno ug pribadong sektor nga gilambigit sa pork barrel ug Malampaya scandals. Aron makahatag ta nila sa labing tukma nga tinan-awan kun matsambahan sa mga tugpahanan, mga kan-anan ug ubang mga dapit nga tapokanan sa daghang katawhan. Di sab nato laktawan ang atong kaugalingong nataran. Suhituon ang mga dagway sa mga politiko ug mga opisyal ug kawani sa Customs, BIR, LTO, DPWH ug ubang ahensiya nga palasyo ang kabalayan ug nanguhong ang luhong mga sakyanan. Di kinahanglan nga sigahan sa mata. Kun tuohan si Tuason ug ang kongresista, ang pag-isnab sa text ug pagtutok igo nang makahasol sa ilang konsiyensiya.
* * *