Sa katugnaw sa panahon, maayo gayung dili ibangon matag buntag. Taas nga panahon nga sigeng itikungkong sa higdaanan tungod kay pwerte ka nindot pa nga ikatulog tungod sa grabe nga katugnaw
Karon pa ko nakasinati niini. Hinuon, sama sa naandan, tugnaw gayud karong panahona. Kini tungod sa hangin gikan sa Russia, China ug uban pa didto sa norte nga ania napadpad sa Pilipinas.
Apan lahi ang panahon karon. Mora’g makahilis sa panit ang katugnaw, ilabina panahon sa kaadlawon. Ug aron nindot ang katulog, balukot sa habol na lamang kita aron pawala sa grabe’ng katugnaw.
Hinuon, adunay dakong kadaut ang dala usab niini, ilabina sa mga mag-uuma. Daghan sa mga tanom sa kabukiran ning dakbayan sa Sugbo ang nangalumoy gumikan sa grabe’ng katugnaw.
Daghan usab sa mga hayop ang mga nangamatay. Didto sa lungsod sa Balamban, dakong problema sa mga mag-uuma ang grabe’ng katugnaw nga mipatay na sa daghang hayop ug milumoy sa ilang mga tanom.
Karon pa kini nahitabo. Hinungdan sa atong kakugang. Sa una wala ko kadungog og reklamo sa mga mag-uuma mahitungod sa grabe’ng katugnaw sa panahon nga naghatag og dakong puwerhisyo sa ilang panginabuhian.
Hasta ang mga opisyal sa kagamhanan sa dakbayan sa Sugbo nakuratan niining maong kalamidad. Hinungdan nga wala magkadimao ang ilang desisyon pagsulbad ning maong problema.
Samtang gipailalum sa konseho sa dakbayan ubos sa state of calamity ang 17 ka bukirang barangay, dako usab nga supak si Mayor Michael Rama niini. Matud niya nga iresponsable kuno kadto nga desisyon sa konseho.
Apan angay’ng hunongon na kining maong kayagaw diha sa Cith Hall. Mas maayo hinuon nga mohimo ang lokal nga kagamhanan og dinaliang aksiyon pagtabang niadtong mga apektadong mag-uuma.
Matud pa sa weather bureau, hangtud pa sa sunod bulan kining katugnaw nga atong nasinati karon. Kini gumikan usab sa winter nga padayong nasinati didto sa northern hemisphere.
Tungod niini, padayon pa atong tikuko ug balukot sa habol matag kaadlawon.