Sa hagdanan paingon sa naglaray’ng lingkoranan sulod sa simbahan sa Alliance of Two Hearts, Banawa, Cebu City, didto sa bungbong may gipaskin nga pahibalo: Nga panahon sa hapit na ang pagpangalawat, diin iisa sa pari ang sagradong pormas, kinahanglan tanang nanimba mangluhod.
Dili kay kini lang. Sa wala pa moingon ang pari nga: “Kini mao ang Kordero sa Diyos nga nagawagtang sa sala sa kalibotan...†gianunsiyo-sultian pa gyud ang nanimbahay sa pari: “Tanan, palihog mangluhod!â€
Apan sakit kaayong palandungon, nga may pipila lang gihapon ka anino ang nagpabiling nagbarog. Nakadungog kaha sila sa kinasingkasing hangyo sa pari? Nasayod kaha sila nga kadtong maong awhag, mga pulong kadto sa Ginoo nga gilitok sa Iyang alagad?
Kaanugon sa atong pagsige’g simba. Unya, bungol diay kita bisan sa gamay kaayong sugo nga Iyaha sa Kahitas-an. Pagpangluhod lang sa pipila ka gutlo, mao ray Iyang gipangayo. Unya, wa gyud nato patalinghugi? Lisod ba diay ang pagpiko sa atong mga tuhod agi’g pagyukbo sa Iyang lawas nga gibayaw sa pari alang sa kaluwasan natong mga makasasala?
Wala’y ludhanan? Hugaw ang sawog? Hadlok magkahugaw ang karsones o sinina? No, dili kini maoy himuong bug-at rason nganong dili makaluhod. Basta, may igo lang kitang kusog nga makasugakod, angay lang nga sundon nato ang awhag sa pari. (Gawas lang kaha kun ang misimba, masakiton ug dili kaya ang pagluhod. Kini excusable). Kay kun ang atong tumong sa pagsimba mao ang pagpakighinabi sa Ginoo, dapat lang nga sundon nato unsay Iyang gusto sa wala’y bisan gamay’ng imik sa pagsupak.
Usa baya kini ka simpleng pagsulay unsa ka, kamatinud-anon sa pagsunod sa sugo sa Ginoo? Dinhi masukod giunsa nimo pagtahod ang Iyang gimbut-an? Dinhi tin-aw’ng makit-an kinsa ang masinupakon? Kinsa ang mga linalang nga ultimo sa mga gagmay’ng butang dili kasaligan? Ug kini gimatuod niadtong pipila ka tawo, kinsa bisan diha sulod sa simbahan, wa gyud mutahod sa mga pulong sa Diyos?