Bisan sa pamolitika ug kapalpakan sa iyang kagamhanan sa pagtubag sa panginahanglan sa mga nabiktima sa kalamidad sama sa linog, bagyo ug gubat kontento gihapon ang mga pinoy sa trabaho ni Pangulong Noynoy sigun sa resulta sa survey nga gihimo sa Social Weather Station (SWS) sa miaging buwan sa Disyembre 2013.
Nganong nakontento ang mga pinoy sa trabaho sa pangulo bisan sila nagreklamo ug mga nagbagulbol, sila lang ang nasayod ug mitukma lamang usab seguro sa ilang kaugalingong sukdanan ang mga pangutana kanila sa mga taga SWS nga nagpahigayon og survey maong migawas nga nakontento sila.
Ang pangulo nagpabiling gamhanan ug influenciado maong taas gihapon ang iyang satisfaction performance. Ning tuig 2014 mosamot pa gyod ang pagka gamhanan ug ang pagka influenciado sa pangulo tungod kay gihatag kaniya ang pundo sa pork barrel sa mga magbabalaud nga giwagtang tungod sa pork barrel scam.
Akong giingon nga ang pundo sa pork barrel gihatag ngadto sa pangulo tungod kay ang giwagtang nga pundo gihatag na man ngadto sa mga nagkalainlaing departamento sa iyang gobyerno busa ubos na kini sa iyang pagmando. Dinhi gikinahanglan ang atong mga pagbantay.
Tungod sa kalagot sa katawhan sa pork barrel scam gipanawagan niini ang pagwagtang sa pork barrel fund. Tungod kay ang anaa sa ilang huna-huna mao lamang ang pagwagtang sa pundo nga ilang gikalagotan, wala na sila maghuna-huna asa ipaslak ang pundo. Karon ang pork barrel fund atoa na mopaingon sa Malakanyang.
Ang pundo nga mipaingon sa Malakanyang posible usab nga abusohon. Sa kadaghang salapi nga anaa sa iyang mga kamot dako ang posibilidad nga mahimong diktador sa modernong panahon si Pangulong Noynoy Aquino. Moderno tungod kay dili na man ang armas ug armadong kusog sa nasud ang magpatuman sa diktadorya kun dili ang salapi o pundo naman ug ang iyang mga kalihim.