Dunay misugyot ngadto ni Mayor Michael Rama nga hatagan lang og katapusang higayon ang Las Vegas KTV og pabuksan lang kini pagbalik apan kun makahimo’g laing kalapasan pinaagi sa pagpasundayag og law-ay, sirad-an na g’yud.
Buyno, kadali ra kaayo ta nga malooy. Kun ako ang pangutan-on, uyonan nako nga pabuksan pagbalik ang Las Vegas KTV apan estrikto na g’yud nga i-monitor kini kanunay.
Ang maayo tingali nga tugotan ninyo ang mga “agents†sa City Hall nga makasulod sa inyong balay-patigayon nga dili na mobayad og entrance fee. Kay mahal ra ba kaayo ang entrance fee diha – tag P200 ang lalaki ug P300 ang babaye.
Ambot ngano kaha nga mahal man ang bayad sa babaye kun mosulod. Tinuod, kaming mga sakop sa media giawhag man gani sa mga opisyal sa City Anti-Indecency Board (CAIB) nga maoy maniid sa hilas nga pasundayag sa Las Vegas KTV.
Mibalibad lang hinoon ko kay wala g’yud ko maanad pagtan-aw nianang mga malaw-ay nga talan-awon. Gani dihang gipangutana kami kagahapon ni Mayor Rama kun nakaadto na ba kami sa Las Vegas, una ko nga miingon nga wala.
Tinuod man ‘sab g’yud nga una nako nga pag-adto sa Las Vegas KTV mao kadtong pagsirado na. Wala diay ko masayud nga kanunay man unta ko nga anaa sa SM City.
Unsaon nga basta anaay magkidlap-kidlap nga maoy sagad suga sa mga balay-kahilayan dili man g’yud ko hilig motan-aw. Tinuod g’yud ning ako, wala ko mamakak.
* * *
Si Mayor Rama kagahapon wala na modugang paghimo’g kumentaryo sa giingong bati nga design sa pagatukoron nga airport terminal building diha sa Mactan Cebu International Airport.
Apan matud ni Rama nga angay’ng susihon sa Department of Transportation and Communication (DOTC) ang gi-report nga dili maayo nga rekord sa highest bidder – ang GMR Infrastructure Limited nga maoy kasosyo sa Megawide Construction.
Nasayud si Rama nga ang mga sakop sa Bids and Awards Committee sa DOTC mohimo gayud sa ilang katungdanan nga mao ang paghashas kun ang winning bidder angay ba nga maoy tugyanan sa pagmugna sa dakung proyekto nga ipaagi sa Private-Public Partnership (PPP).
Ang gitawag og PPP mao nga human unya sa pagmugna sa project, ang GMR-Megawide consortium maoy modumala sa airport sulod sa 25 ka tuig. Wala pa ako makakita sa kontrata kun duna ba’y mga proteksyon aron nga dili malupigan ang katawhan.
Ang kuyaw kun sulod sa gidugayon nga ang kontraktor sa terminal ang magdumala himoon nila nga mahal ang bayranan sa terminal fee ug uban pa, kita nga publiko nga moagi sa airport ang maapektahan.