Kun basihan ang resulta sa piniliay sa Association of Barangay Captains (ABC) pilay na si kanhi kongresista Tomas Osmeña tungod sa makabungog nga kadaugan nga nakuha ni Tisa Barangay Captain Philip Zafra isip bag-ong presidente sa ABC.
Sa nahisgotang piniliay nangharos ang grupo ni Zafra nga kaalyado ni Mayor Mike Rama ug wala gayu’y bisag usa na lang ang gipadaug sa grupo ni Capitol Barangay Captain Manuel Guanzon nga kaalyado ni kanhi kongresista Tomas Osmeña.
Ang resulta sa piniliay sa ABC dayag nga kamatuoran nga hinay-hinay nang nakasabot ang mga kapitan sa barangay nga mga kaalyado sa kanhi kongresista nga kabahin na lamang sa kasaysayan sa politika sa Sugbo ang kanhi kongresista.
Sigun sa resulta sa miaging Oktubre nga piniliay sa barangay, 42 lamang sa 80 ka mga kapitan sa dakbayan sa Sugbo ang midaug ubos sa kampo ni Mayor Mike Rama ug 38 ang mga kapitan nga midaug ubos sa kampo ni kanhi kongresista Tomas Osmeña. Busa gamay lamang ang mayoriya nga nakuha sa kampo ni Mayor Mike Rama.
Apan sa piniliay sa ABC nakakuha na si Kapitan Philip Zafra og 53 botos batok sa 22 botos nga nakuha ni Manuel Guanzon human maihap ang boto sa 77 ka mga kapitan nga mitambong sa ilang gipahigayong piniliay.
Dinhi imong makita nga daghan na gayod sa mga kaalyado kaniadto ni kanhi kongresista Tomas Osmeña ang mitapon na sa kampo sa mayor ug akong napanglantawan nga sa umaabot nga mga adlaw mas daghan pa unya ang mamiya sa kampo sa kanhi kongresista.
Lain usab natong bantayan nga makonsiderar nga sukdanan kun gamhanan pa ba o wala pa ba mawagtang ang gahom sa kongresista mao ang piniliay sa Barangay Councilors League of the Philippines Cebu City Chapter karong Enero 11, 2014.
Gipaabot nga magbangga sa pagka presidente sa BCLP mao sila si Atty. Raymond Alvin Garcia nga kaalyado ni Mayor Mike Rama ug si Franklin Ong nga kaalyado ni kanhi kongresista Tomas Osmeña. Atangi!
* * *
Maayong Pasko ug bulahang Bag-ong Tuig kaninyong tanan.