Gipahibawo sa Malacañang sa miaging semana ang pagluwat sa katungdanan sa usa sa mga tigpamaba sa presidente nga si presidential communications Sec. Ricky Carandang.
Matud sa palasyo kutob na lang karong Disyembre 31 ang serbisyo ni Carandang.
Apan wala itug-an sa mga opisyal sa palasyo unsay tinuod nga hinungdan sa iyang pag-resign nga duna pa may duha ka tuig kapin ang administrasyong Aquino.
Matud sa Malacañang nga buot na nga mobalik si Carandang sa private sector. Kinsay ilang giilad?
Kun gibiyaan ni Carandang ang maayo niya nga trabaho sa media aron mouban ni Aquino sa Malacañang wala ko kakita sa rason nga basta niyang biyaan ang iyang pwesto kun walay igong hinungdan.
Dili kaha nga napugos si Carandang pagluwat sa katungdanan human sa dako niyang palpak sa media coverage sa epekto sa bagyong Yolanda?
Way laing mabasol nganong nabaniog sa tibuok kalibutan ang kahinay sa lihok sa atong gobyerno pag-atiman sa mga biktima sa bagyo kun dili si Carandang.
Ang akong tinubdan nagkanayon nga salida unta ni Carandang ang pagsiguro nga moabot gyud sa dapit nga naigo sa bagyo ang mga international media sama sa CNN.
Tumong unta tingali niya nga mahibaw-an sa tibuok kalibutan unsa ka makalulooy ang atong kahimtang.
Apan labaw kay sa pagpadangat sa mensahe unsa kamakalolooy ang atong pagkabutang nabulgar atubangan sa international community unsa ka inutil ang pamunoan ni Aquino.
Si Carandang ang giingong nabuthan tungod kay siya maoy giingon nga naniguro nga ang mga ekipo sa international media maabot gyud didto sa Tacloban.
Gani sigun pa sa akong tinubdan mas gisiguro pa ang paghatud sa mga ekipo kaysa mga relief goods.
Tingali mao ni hinungdan nganong dugay niabot ang tabang alang sa mga biktima.
* * *