Usa ka bug-at nga hukom ang gihimo sa dakong opisyal sa Comelec, apan makatarunganon.
Makatarunganon alang niadtong mga napili sa miaging election nga nakatunol sa ilang SOCE sa lokal nga buhatan sa Comelec apan wa madawat sa ulohang buhatan niini.
Labaw nga makatarunganon alang sa mga nakatunol og SOCE apan sipyat ang pagfill-up sa ubang mga blanko niini o kaha nasayop ang kuwentada sa ilang gasto sa panahon sa ilang pangampanya.
Misamot ang kamatarunganon sa maong lakang alang niadtong wala gyud mosumiter o kaha wa magtagad sa balaod kay lagi ngilngig na sila nga di mahadlok og balaod.
Sa bahin ni Comelec commissioner Sixto Brillantes mas maayo usab baya nga ipaila niya ang balaod ngadto sa katawhan.
Kay daghan ang nagtuo nga nagsalig na lang ang uban tungod kay pinili sila sa mayoridad nga mga botante ug gigamyan sila sa balaod.
Kining 422 ka mga pinili nga opisyal, giingong may wala mosumiter og SOCE, ang uban misumiter apan daghang sayop sa mga impormasyon nga ilang gibutang sa application form.
Busa nakahukom si Brillantes nga pakanaugon sila sa katungdanan, apan giisip sa mga hingtungdan nga over-acting ang gihimo sa labaw’ng opisyal sa Comelec.
Unsa man misipyat ba ang kagamhanan sa pagtudlo kang Brillantes kay mopatuman man sa balaod?