Niadtong Disyembre 9, 2013, adunay advent symposium nga gihimo didto sa may Marcelo Fernan Theater. Nahimong main speaker mao si Archbishop Socrates Villegas sa Lingayen Dagupan Archdiocese. Nahimong unod sa iyang pakigpulong kining tutulo ka mga mahinungdanong punto.
1. Anaa ang Dios
2. Aduna ko’y kalag ug adunay lawas. Mamatay ang akong lawas apan magpabilin ang akong kalag.
3. Mas labaw ang gugma ug pasaylo sa Dios kay sa akong mga sala.
Dugang pa niya, dili silot ang nahitabong mga kalamidad alang kanatong mga tawo. Diha sa atong tinguha nga kita mausab, nanghinaut kita nga mamahimong andam. Apan ang Dios padayong mousab kanato bisan pa man sa atong ka dili andam. Kini tungod kay Dios padayong makig-uban kanato bisan pa man hangtud sa katapusan sa kalibutan.
Himoa kining mosunod:
1. Ginhawa og lawom, relax uban ang pagpiyong sa imong mga mata.
2. Sa imong hunahuna ug kasingkasing himoa kining mantra: Ginoo bag-oha ako bisan dili pa ako andam!
3. Himoa kining maong pag-ampo nga mosulod sa imong hunahuna, kasingkasing ug makita mo ang resulta niini sa imong mga buhat.