Dear Atty. Divine,
Nagtrabaho ko sa usa ka kompaniya sud sa lima na ka tuig. Ang akong igsuon atua magtrabaho sa gawas sa nasud ug iya kong gipangitaan og employer. Karon aduna na siya’y nakit-an nga employer nako apan dinalian kaayo kay gusto niya palargahon ko dayon. Nananghid na ko sa akong Manager nga mo-resign nako apan ila kong gipugngan kay wa kono’y makapuli nako. Nag-submit ko og resignation letter apan wa nila dawata. Ang akong pangutana atty kun makapugong ba diay nako ang akong kompaniya kun gusto nako nga mo-resign? Unsa may angayan nakong buhaton? Hinaut imo kong matambagan sa angay nakong buhaton.
Daghang salamat.
Hazel
Dear Hazel,
Ang empleyado adunay katungod nga moresign sa iyang trabaho. Di makapugong ang employer o kompaniya niini gawas lang kun aduna sila’y balido nga rason sama sa kontrata nga inyong pinirmahan after ka gipailawom sa training ug uban pang balido nga rason. Kun wa moy sinabutan sa imong kompaniya mamahimo kang mo-resign. Basi sa atong balaod sa Article 285 sa atong Labor Code, kini nagkanayon nga ang empleyado mamahimo nga boluntaryong mobiya sa iyang kompaniya nga gitrabahoan pinaagi sa pag-submit og resignation letter. Kinahanglan nga ang imong resignation letter moepekto usa ka buwan gikan sa imong pagsumiter. Kini aron paghatag og igong panahon sa imong employer pagpangita og puli sa imong trabaho nga biyaan.
Kun matuman mo kanang one month notice wa nay mahimo pa ang imong employer niini. Busa ang maayo nimong buhaton karon mao ang pag-submit og irrevocable resignation ug kun di sila mosugot nga mo-resign ka dayon then you follow the law nga 30 day notice. Hinaut nga akong natubag ang imong pangutana.
Daghang salamat and God Bless.
Atty. Divine
Kun kamo adunay pangutana ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com. ug akong tubagon ang inyong pangutana matag adlaw’ng Miyerkules ug Domingo pinaagi sa akong column.