Pamalandong sa Lukas 17;11-19
Kining maong bahina sa ebanghelyo mao ang usa sa mga nindot nga hulagway sa bili sa pagka-mapasalamaton. Adunay napulo ka mga sanlahon nga giayo ni Jesus gikan sa ilang balatian. Ang siyam nga Judio samtang ang usa Samaryanhon. Wala kini magpasabot nga ang siyam dili mapasalamaton kun itandi sa usa nga Samaryahon nga nibalik aron magpasalamat sa Ginoo. Atong pamalandongan kining mosunod nga mga punto sa dili pa kita mohatag sa atong paghukom.
1. Ang mga Judio ug mga Samaryahon wala’y maayong kabubut-on sa usa’g-usa. Busa kuli kaayo nga ang Samaryanhon nga sanlahon makakita pa og laing panahon aron pasalamatan ang Ginoo nga miayo kaniya. Human siya naayo, angay lamang nga siya mobalik aron magpasalamat kaniya.
2. Ang siyam nga mga Judio ang dako pa kaayo og kahigayonan nga makigkita kang Jesus aron sa mas personal nga paagi, siya ilang pasalamatan.
Kay lagi ang sanla diha sa konteksto sa mga Judio ang dunay kalambigitan sa ilang Relihiyon ang nagdumili ni bisan kinsa nga nataptan niini nga moapil sa bisan unsang kalihukang liturhikal mao nga ang masakiton nahimong hawa sa katilingbanong bul-og. Mao nga ang pag-ayo ni Jesus kanila ang nagdugtong nila balik gikan sa maong panagbulag. Sa matag higayon nga dunay masakit sa atong banay ug sa atong katilingban, kita usab ang apektado niini. Ang tanan konektado diha sa balatian ug diha sa kaayohan.