Trese-anyos nga batang lalaki nga naggunit pa sa iyang duwaan gilaslasan sa iyang liog ug tiyan. Didto kini nahitabo sa Tacloban, ang lugar nga gihampak pag-ayo sa bagyong Yolanda niadtong Nobiyembre 8.
Mao kini ang balita sa Agence France Pesse nga misugat sa akong mata kagahapon pag-abli nako sa internet. Gisaysay sa balita ang “anarchy†nga nahitabo sa Tacloban diin ang mga tawo malukop na lang sa pagpangawat (looting) og pagkaon ug bisan dili pagkaon.
Apan sa pagtiwas nako’g basa sa balita, misurok akong dugo nga nagbasa sa reaksiyon sa Malacañang. Si Ricky Carandang, usa sa communicator sa Palasyo diin magpuyo ug mag-opisina atong presidente, mihimakak pa gyud sa looting, pagpangawat ug ubang bayolenteng panghitabo sa lugar.
Usa ka doktor nga si Corazon Rubio, usa sa mga survivors sa storm surge, mikonpirmar mismo sa maong balita sa iyang nakita nga pagpangawat. Base sa mga balita sa TV, radyo ug pamantalaan, ang pagpangawat nahitabo human gyud mobiya si bagyong Yolanda sa Tacloban.
Si Mam Ernesta Heruela napadpad dinhi sa Sugbo uban sa iyang pamilya nga gikan sa Tacloban ug Palo, agi sa Samar diin didto nakasakay paingon dinhi sa Sugbo.
Ang pamilya ni kanhi Kap Tess Villamor sa Tungkop maoy mipadayon sa pamilya sa ilang balay.
Ang maong pamilya nga Heruela gikan sa Tacloban nahimong bisita sa gi-organize namo nga “Teban and Goliat Show†ug Disco Concert for A Cause niadtong Sabado sa gabii didto sa Minglanilla Sports Complex, diin ang tiket bayloan og mga relief goods nga i-apod-apod usab namo ngadto sa mga biktima sa bagyo. Silang Noy Teban ug bay Goliat, ug mga local Bizrock bands mi-perform libre isip halad nila ngadto sa mga biktima sa bagyo.
Si Mam Heruela mismo ang mitestimoniya sa iyang kasinatian gikan sa pagsugod og hapak sa bagyo ngadto sa pagtaas sa tubig nga nakapugos kanila pagdangop sa nabungkag nga kisame, hangtod sa ilang pagka-anod ug naluwas sa mga naanod nga bani sa saging, punoan sa lubi ug punoan sa kahoy.
Paglurang sa bagyo, si Mam Heruela nagkanayon, nga miapil siya sa paglaroylaroy sa mahugaw nga kadalanan aron sa pagpangita og kaon ug ilang nasugatan ang tindahan diin sa gawas nanagpasad ang mga de lata.
Pagka-sunod adlaw, mikagiw ang pamilyang Heruela paingon sa Samar tungod sa kagubot na sa lugar ug sa kabaho tungod sa nanagpasad nga mga patay’ng lawas. Ang kawalay gobyerno nga nagtagad sa ilang panginahanglanon maoy nakaingon nga ang mga tawo midangop na sa pagpangawat sa mga tindahan.
Kun wala pa sawaya sa CNN si Pres. Noynoy Aquino, dili mopaspas og diyutay ang pagtabang sa Malacañang ngadto sa Tacloban. Gisaway sa international media ang kagamhanan ni Noynoy tungod sa kalangay niini pagtagad sa mga biktima sa bagyo.
Gani hangtod karon, aduna pa gihapoy mga patay’ng lawas nga wala mangaugkat.
Ang maka-uulaw nga sitwasyon karon mao nga ang mga Amerikanong sundalo ang midumala sa Tacloban (sa airport hangtod na sa mga baryo nga nagrabehan) tungod sa kapakyas sa administrasyong Aquino paghimo og “initiative†nga masipong ang kagubot ug matabangan dayon ang panginahanglanon sa mga residente sa lugar.
Ako makasinggit: “Where is my commander-in-chief Noynoy Aquino?
Kay si Noynoy man ang commander-in-chief ug ubos sa iyang “standby power†pagdeklarar og “emergency†sa mga sitwasyon nga sama sa nahitabo sa Tacloban, mahimo siyang mo-takeover sa Tacloban aron ipatuman ang kahusay sa lugar.
Dili kinahanglang naa siya sa Tacloban. Ang kinahanglan mao lang ang pagpangunay niya og pakanaog og kamandoan pinaagi sa “executive orders†aron ipatuman ang angay ipatuman.
Ang gibuhat niya sa unang mga adlaw human sa bagyo mao ang pagsaway nganong pakyas pagpatuman sa balaod ang mayor sa Tacloban.
Ngano kaha? Kay lagi ang Tacloban gidumala man og usa ka Romualdez nga paryente ni Imelda Romualdez Marcos, ang asawa sa diktador nga si Ferdinand Marcos nga gipasanginlang maoy hinungdan sa kamatayon ni kanhi Senador Ninoy Aquino nga amahan ni Presidente Noynoy Aquino?
Kun si Noynoy nangunay og superbisar sa pakiggubat sa mga rebeldeng MNLF ni Nur Misuari kanus-a nawala siya og upat ka adlaw sa Malacañang aron pagpuyo sa Zamboanga City, nganong dili man siya mangunay pagsuperbisar sa Tacloban? Kay dili man siya makapabuto sa iyang armas sa Tacloban, dili sama sa Zamboanga?
Maayo gani kay abtik nga milupad si DILG Secretary Mar Roxas paingon sa Tacloban aron siya’y magsilbeng “alter ego†sa presidente ug aron korehian ang mga sayop nga nahimo sa kagamhanang nasyonal. Karon, siya’y nangunay sa pagdumala sa gobyerno didto sa Tacloban, apan naa ang mga Amerikanong sundalo.
Si Bise Presidente Jejomar Binay miadto lagi sa Tacloban aron mang-apod-apod og relief goods, apan misakay usab sa kahigayonan pinaagi sa pagbutang og sticker sa iyang nawong sa mga plastik nga nay sulod nga mga pagkaon.
Apan maayo na lang na kay bisan og papitlan og nawong ni Binay ang mga plastik, dili man na ang importante. Ang importante mao ang sulod sa plastik nga makalabang sa kagutom sa mga biktima ni Yolanda.
Goliat: “Noy Teban, mobalik kuno si Yolanda sa Bisayas.†Noy Teban: “Ngano man, Goliat?
Goliat: “Mangayo siya’g pasaylo noy.â€