Ang kalibotan danglog. Bisan ang professional runner, may hugna gyud nga siya madagma. Samot na sa natad sa kaminyoon. Daghang asawa o bana ang nahisukamod diha sa ilang panag-ipon. Sa higayon nga mahitabo kini, unsa ba ang mopatigbabaw. Gugma ba, o ang kasilag?
Sagad, kun ang bana o asawa madakin-as ug mahagba sa madanglog nga tentasyon, imbes tabangan kini sa kapikas aron makabangon, tiwasan hinuon. Bisa’g nangayo nag pasaylo ang nakasala, dili lang gihapon pasayloon. Hinunoa, patiran, bun-ogon ug patyon pa gani kun magkalisod!
Nalimot ang tawo nga gisulayan lang kita sa Ginoo unsa kalig-on ang atong gipanumpaan atubangan sa Iyang altar, diin kita nanumpa nga: “For better and for worse, till death do us part.’ Ning maong paagi, masuta kun ang naghari sa matag usa mao ba ang matuod nga gugma? Kay ang matuod nga gugma walay limit ug walay kondisyon. Andam mosakripisyo ug mopasaylo sa tanang panahon.
Angay itanom sa dughan nga ning kalibotan, kitang tanan makasasala. Wala’y usa kanato nga dili makalapas sa unsay gidili sa Ginoo. Busa, sa higayon nga mahagba ang atong kapikas sa kadanglog sa kalibotan, mao kini ang talandugong yugto nga nagkinahanglan siya sa atong kinasingkasing nga tabang. Ug dili ta ihikaw ang pagtunol sa duruha ta ka mga kamot sa pag-agak kaniya aron siya makabangon pag-usab. Buwahan, makapadayon gihapon kita paglawig sa unahan.
Paninguhaon lang gyud. Nga kun kita nakasala unya gipasaylo, paningkamotan nga dili na gyud ta makasala pag-usab. Consciousness of the mind ray gikinahanglan. Kutob sa butang nga giplanohang buhaton, mangutana una gyud ta sa atong kaugalingon kun ang pagbuhat sa ingon dili ba supak sa commandment ni Lord? Unsa ba ang iyang commandment? Love ra gyud. Mao ra! Kay kun conscious lang gyud ta pirme, di ta makasala, uy!