Mapada na karong semanaha ang labing dakong hugpong sa mga hinabang gikan sa mga Sugbuanon alang sa makaluluoy nga mga biktima sa bagyong Yolanda sa Tacloban City ug kasilinganang mga dakbayan ug kalungsoran sa Leyte, Southern Leyte, Biliran ug sa mga lalawigan sa Samar. Dakong barko sa Gothong Southern Shipping Lines gitugotan na sa Philippine Coast Guard nga makadunggo sa pantalan sa Tacloban, nga nagpabiling lig-on bisan gihapak sa higanteng mga bawod nga nipatag sa hapit tanang istruktura sa usa ka kilometro nga wanang padung sa yuta.
Mogikan ang barko sa alas-12 sa udto karong Miyerkules. Gitakdang modunggo sa Tacloban human sa unom ka oras nga paglawig. Labing dakong hagit karon mao ang pagpuno aron di maanugon ang biyahe sa barko.
***
Gitagana sa Gothong Southern Shipping Lines ang tibuok barko alang sa mga hinabang nga matigom sa Kapamilya Relief Campaign alang sa mga biktima sa bagyo. Mahimong kargahan ang barko og hangtod 140 ka containers. Duna mi duha ka adlaw nga lugway sa pag-abot sa kapasidad sa barko.
Di hinuon lunlon pagkaon ug tubig ang ikarga sa barko. Mahimong magpada og ambulansiya ug ubang sakyanan ang Emergency Rescue Unit Foundation. Nananghid na sang daan si Cebu City Councilor Dave Tumulak nga nagplano nga mokarga ang Cebu Contractors Association og heavy equipment nga gikinahanglan kaayo karon sa Tacloban.
***
Di hinuon tinuod ang pasangil nga Tacloban ra ang gipahinungdan sa tanang hinabang nga gipasiugdahan sa nagkalainlaing kahugpongan. Nakapada na mi gabii og pagkaon ug tubig alang sa Ormoc City gikarga sa dakong trak sa Cebu City Government sakay sa barko sa Roble Shipping.
Duha sab ka trak sa pagkaon ug tubig ang among napada alang sa San Francisco sa isla sa Camotes. Gitabangan mi sa lokal nga mga opisyal sa San Francisco pinaagi sa pagpada sa mga trak ug paghikay sa sakyan nga barge gikan sa pantalan sa Danao. Mas daling maapud-apod ang mga hinabang kun mao say himuon sa ubang local government units.
***
Nagpada sab og trak ug mga kargador ang munisipyo sa Borbon maong nabahinan dayon sila sa mga pagkaon ug tubig nga gihinabang sa mga Sugbuanon pinaagi sa Kapamilya Relief Campaign. Puno ni sa nahatdan na namo og walo ka trak nga mga hinabang pagkaon ug tubig nga mga lungsod sa Daanbantayan, Medellin, Sogod, Catmon ug Carmen.
Utangan pa mi sa Dakbayan sa Bogo ug mga lungsod sa Tabogon, San Remigio, sa mga lungsod sa Bantayan, Madridejos ug Sta. Fe sa isla sa Bantayan ug sa mga lungsod sa Pilar, Poro ug Tudela sa isla sa Camotes. Kutob sa mahimo paningkamotan namo nga maabtan og hinabang ang tanang nabiktima sa bagyo sa labing daling panahon.
***
Email: leo_lastimosa@abs-cbn.com.