Gikonsiderar ni Pangulong Noynoy Aquino ang pagdeklarar og balaud militar sa Tacloban tungod sa pagkahagsa sa kahapsay ug kalinaw sa maong dapit human magrabihi sa bagyong Yolanda.
Sa pagkakaron gibana-bana sa mga otoridad sa nahisgotang dapit nga moabot ngadto sa napulo ka libo (10,000) ka mga tawo ang nangamatay sa dakbayan sa Tacloban lamang. Ang maong gidaghanon sa mga namatay wala pa kini labot sa giingong tulo ka gatos (300) ka mga tawo nga namatay sa Samar nga unang giigo sa bagyo. Wala pa usay labot niini ang mga namatay dinhi sa Sugbo ug uban pang mga dapit nga giagian ni Yolanda.
Tungod sa kagutom, kauhaw ug uban pang panginahanglan sa mga naigo sa bagyo mitumaw ang grabing kinawatay ug ang mga hinabang nga nangabot gipangdumog sa mga tawong gipanggutom ug gipang-uhaw didto sa Tacloban.
Ang mga polis nga tigpatuman sa kahapsay ug kalinaw sa dapit wala na makakontrol sa mga tawo tungod kay sa tulo ka gatos ug nueventa (390) ka mga polis sa Tacloban kawhaan (20) na lamang niini ang nakatunga sa ilang trabaho tungod kay sila mga biktima usab ni Yolanda busa dugang mga polis ug militar karon ang gipadala sa gobyerno sa nahisgotang lugar.
* * *
Nagsunod-sunod karon ang katalagman nga miigo sa nasud. Gikan sa linog ngadto sa bagyo wa pa gyod papahuwaya ang mga tawo nga giigo niining maong katalagman. Ambot unsay buot ipasabot niining tanan. Seguro paagi kini sa kinaiyahan sa pagtudlo sa atong mga opisyal sa gobyerno unsaon sa paggasto ang savings nga pundo sa gobyerno.
Seguro paagi kini sa kinaiyahan sa pagpahigmata niadtong mga nalambigit sa kontrobersiyal nga PDAF, DAP ug Malampaya funds nga adunay mas maayo pang gamitan sa nahisgotang pundo ina kay kawaton ug usik-usikan.
Maayo unta nga motabang ug ibalik ngadto sa mga tawo nga naigo sa kalamidad ang bilyones nga salapi nga nakaw-kaw sa mga nalambigit sa kontrobersiyal nga pundo.