Gitun-an pag-ayo sa mga abogado ni senador Bong Revilla ang pangatarungan nga gisundog ang iyang pirma.
Gumikan sa maong isyu, ipadayag ni Bong nga di siya maoy mihimo sa mga aplikasyon ug tanang mga dokumento aron makagawas ang P200 milyones kapin nga PDAF niya.
Buot ipakita ni Bong nga di tinuod nga na-shot sa iyang bulsa ang maong kantidad kay didto ra kini sa misundog sa iyang pirma o kaha kang Janet Lim Napoles ang nabaniog nga utok sa P10 bilyones nga pork barrel fund scam.
Gumikan niini gituohang makaipsot ang senador sa kaso nga iyang giatubang.
Unya naglaraw ra ba siya nga mobiyahe usab ngadto sa gawas sama ni senador Jinggoy Estrada.
Si Estrada hayahay na kaayo didto sa mabugnaw nga hangin sa America ug kun tan-awon niya nga mapriso gyud siya, aw unsa may iyang balikon dinhi, aron magpapriso?
Kun tua na usab si Bong sa gawas, si senador Juan Ponce Enrile na lang ang mahibilin.
Aw hinuon mga batan-on pa si Jinggoy ug Bong ug angay pa kining mopahimus sa tawhanong kalipay sa kalibotan.
Kaanugon sab baya kun mangapriso sila nga mga guwapa ra ba sila og asawa, ug mga kuwartahan pa.
Si Enrile, may pangidaron na nga kun mapriso, gamay na lang ang pag-antus niya sa samok nga prisohan tungod kay sa adlaw pa talisawop na.
Ambot wa ba kaha kini magplano nga molayas usab .