Paita, daghan bayang mga mikandidato sa pagka-kapitan nga migasto gyud sa miaging piniliay apan napildi.
Tungod lagi kay incumbent, may gimontar na siyang mga lider sa matag sitio, mga watcher, ug mga bata-bata nga gipabantay niya sa iyang mga kampanya.
Apan ang maong mga sinaligan kanunay nga nagyampungad kaniya sa iyang mga ihatag, sa serbisyo usab nga ilang gitunol kaniya.
Layo pa ang piniliay, nagsige na og pakaon sa iyang mga piyado ug hapit matag adlaw maglitson og manok o kaha baboy.
Sa laktud migasto gyud og libo-libo ka pesos ilabi na sa bisperas diin nagbuntag `intawon sa iyang balay ang iyang tanang sinaligan.
Unya dihang gisugdan na ang piniliay, dagko kaayo og katawa ang tanan lakip na ang mga sakop sa pamilya. Apan pagkahuman sa eskutenyo kalit lang nanghuyhoy ang abaga sa tanan dihang nasayran nga napilde sila.
Pastilan, kahapdos ug kasakit baya sa maong kahimtang, ug kaayo nga isinggit ug isiyagit.
Nganong gisilotan man sa katawhan nga unta nag-alagad na man kanilang daan?
Kay sa pag-alagad sa barangay di nimo malipay ang tanan.
Kun may attitude problem ka, mag-inasyuso ug may mahiubos kanimo, ug di nimo mabawi o mapaulian ang maong kahiubos dilian ka na sa mga tawo, busa mapildi ka.