Adunay mga talan-awon atol sa miaging barangay eleksyon diin atong nakita ang dalaygon nga kinaiya natong mga Pinoy, lakip na ang mga Sugbuanon, kalabot sa pagtuman ta sa atong civic duty.
* * *
Dinhi sa Sugbo, mga tiguwang botante, kinsa ang uban magpaagak pa sa ilang mga kabanay ang naninguha makaadto sa ilang presinto aron sa pagbotar. Kadaghanan niining atong mga lola ug lolo mipakita sa ilang pasensya sa pagpangita sa ilang mga ngan sa listahan aron lang makabotar.
* * *
Diha pa man ganing mga PWD kon persons with disabilities nga kuguson sa ilang mga apo o bahon ka kaha aron lang makasalmot sa usa ka mahinungdanon nga kalihukan sa atong pagka-Pilipinhon.
* * *
Dihay usa ka 78 anyos nga lola kinsa misulti sa usa ka tv reporter nga naninguha gayud siya makabotar kay basin katapusan na kadto niya pagtuman sa iyang katungdanan isip Pilipino.
“78 anyos na ko, basin katapusang tsansa ko na kining pagpili og maayong lider sa atong barangay,†matud niya. Gipakpakan siya.
* * *
Apan dili pa gyud hingpit ang tabang alang sa mga tiguwang (senior citizens) pumipili. Naa pay pipila niini kanila ang gipaantos sa pagkatkat sa bilding diin adto sa ikaupat nga andana nila ihug ang ilang balota. (Sa Manila kini.)
* * *
Diha say nag-wheelchair nga masakitong botante ang wa pasudla sa usa ka school compound kay wa kuno itugot ang wheelchair.
* * *
SA LAING BAHIN ... Daghang mga langyaw ang nidayeg sa patriotic spirit sa mga edaran na natong mga botante ... Daghang salamat sa atong mga magbabasa sa Banat News diha sa Tisa ug Labangon lakip na ang diha nanimuyo sa Katipunan ug A. Lopez sts.