Ang tinuod nga kombati sa election miabot na diin nag-inilogay sa paghupot og gahum sa barangay ang matag kandidato.
Sukad sa kasaysayan , karong tuiga maoy labing daghan og kandidato sa barangay, gikan sa pagka-kapitan hangtud sa mga konsehal.
Unsa ba gyud diay kaanindot ang matawag nga opisyal sa barangay? Tungod lang kay tawgon ka nga ‘honorable’? o kaha tungod lang sa suweldo ug uban pang panguwarta? O kaha tungod kay gusto ka nga manguna alang sa pagpaayo, pagpatahum sa barangay ug sa paghimong mauswagon sa inyong lugar ug sa molupyo niini.
Kun unsa ang imong tuyo nga mahimo kang opisyal sa inyong barangay, way laing gipangandoy ang imong mga silingan, nga kun ikaw ang mahimong amahan sa barangay may katakus ka sa pagpauswag ug kaanindot puy-an niini ug ang kauswagan usab sa panginabuhi sa imong tagi-barangay.
Kun maghisgot ka og maayong puy-an ang imong barangay, nalakip na niini ang kahinlo sa palibot (way mga molupyo nga moiwang lang bisan asa kay way pansayan) ug ang kamalinawon kay way daghang drug addict, mga tulisan, kawatan ug nagkalainlaing kriminal.
Ikaw sir, nangandoy man ka nga makadaug karong adlawa sa imong kandidatora sa pagka-kapitan sa imong barangay, makahimo kaha ka niini.
Di kaha ka maghinuktok lang kay wa kay mahimo kun anaa kana sa poder, ilabi na kun di ka tawo sa mayor?
Unya unsa may imong mahimo kun di ka tawo sa mayor, magpadako ka lang sa imong kuan.
Busa ang kapakyas sa usa ka opisyal sa barangay, kapakyasan sa tanan, kun tinud-anay kang opisyal ayaw pagtanga, lihok alang sa kauswagan sa imong barangay ug sa imong mga konstituwente.