Maribojoc, Bohol -- Sama sa Loon, ang labing naggusbat sa linog niadtong Martes, naglisod sab ang gobyerno paghatod og mga hinabang dinhi. Tungod sa pagkaputol sa mga taytayan ug kadalanan. Kinahanglang isakay og bangka ang mga hinabang gikan sa Tagbilaran City aron makaabot dayon dinhi.
Maong pagkahibawo nako nga magpada og duha ka dagkong diving boats nga puno sa tubig mainom ang Maribago Bluewater Beach Resort (MBBR) paingon dinhi, nihangyo ko nga mokuyog. Maong nia ko uban ni Austrian Consul Julie Alegrado-Vergara, presidente sa MBBR, ug sa akong kinaham nga doktora nga taguon lang nato sa ngan nga Iris Jakosalem. Gawas sa tubig, nagda mi og daghang tambal, pan ug linung-ag nga itlog nga kabahin sa natigom sa nagpadayong Kapamilya Relief Campaign alang sa mga biktima sa linog.
* * *
Samtang nagsuwat ko ini, dul-an na sa usa ka milyon ka pesos ang cash donations nga nadawat sa relief centers sa ABS-CBN Complex sa Jagobiao, Mandaue City ug sa Fuente Osmeña, Cebu City. Padayong naghinakotay sa mga pagkaon ug ubang hinabang ang dagkong mga trak sa Kapitolyo sa Sugbo, Gary Cortes sa NFI, Mayor Albert Ator sa Siaton, Negros Oriental, Muana Construction ug sa Coca-Cola aron mapuno ang dakong barko sa Naval Forces Central (Navforcen) para Tubigon.
Maong nagkinahanglan mi og dugang boluntaryo. Nga gawas nga magda og ilang kaugalingong bawon dagko sab og bukton ug malumo og kasingkasing.
* * *
Naaghat si Consul Alegrado pagtabang pagpada og mga hinabang sa Bohol di lang tungod sa ilang negosyo (Bluewater Resort sa Panglao) kon dili ug labi na sa dako niyang gugma sa Bohol. Taga Sagbayan ang iyang mga apohan ug sa matag motumaw nga kahigayonan moduaw gyod ang tibuok nilang pamilya sa Bohol.
Samtang mapasalamaton sa dakong baha sa hinabang, nanghinaot si Consul Alegrado nga mobarug ang mga Bol-anon sa ilang kaugalingong mga tiil. Matod niya nagpadayon nang sabutsabot sa gobyerno ug pribadong sektor unsaon pagbangon ang turismo ug ubang patigayon human sa linog.
* * *
Gawas sa ABS-CBN ug MBBR, daghang kompaniya ug kahugpongan nga naningkamot sab nga maabot dayon sa hinabang ang labing hilit nga mga barangay ug mga isla. Si Dr. Pek Eng Lim ang nangu sa Emergency Rescue Unit Foundation pagda og ambulansiya, trauma van, paramedics, mga tambal ug pagkaon alang sa mga biktima sa linog. Ang Rotary Club of Mandaue, ubos sa liderato ni past District Governor Arcadio "Dodong" Alegrado, nagpada sab og pagkaon alang sa Sagbayan. Ang Cebu Rouser Club mohatod sab og tubig ug pagkaon sa Loon.
Lapad ang kadaot sa linog. Apan mas lapad ang katakos sa pagtinabangay, pagbangon ug paghiusa. Way katalagman nga makapukan sa kakugi ug determinasyon ug paglaom alang sa mas sanag nga ugma.
* * *
Email: leo_lastimosa@abs-cbn.com.