Duna gyu’y mga tawo nga bisan og naanad na sa kadaghan sa tawo diha sa iyang palibot, wa lang kayo magtagad. Maoy hinungdan nga wa siya’y maisip nga higala. Kini tungod kay magdepende usab ni sa pagtan-aw o atityud nato sa isig ka tawo. Gawas pa, aduna sad kini daghang hinungdan sama anang may sakit sa nerbiyos nga usahay mahadlok o samokan kung makakita’g tawo.
Naa pud hinoon nga hilabihan ka manggiuwawon, di mokihol kun di kabliton. Magkalisud mukosmod ug masuko pa. Kun motagad man, morag kontra gusto makig-atubang og tawo. Ingon sa magpatagad nga gusto siya’y permi tagdon. Pero dunay uban nga naningkamot nga mahimong mahigalaon. Kay nasayud siya nga may daghan ning benepisyo nga kakuhaan og direksyon o giya sa kinabuhi.
Way imposible kun mahigugmaon ka lang sa isig katawo, dili lisud ang pagka-mahigalaon. Aron motaas ang kompiyansa mo nga di ka kulbaan nila, sulaye kini…
(1.) PAHIYUM – Kanunay kang mapahiyumon, sa imong madanihon nga ngabil nga nag-agnig kahulogan nga ikaw daling duolon o mahigalaon. Ibalanse sa pinong linihokan ug ubanan sa malulot mong mga mata.
(2.) MAAYONG IKAHINABI – Ang pakigsuod o maayong pakighinabi maoy paagi nga daghan ka’g mahigala. Kung negatibo kag panlantaw sa kinabuhi, daghang moislag o di magkagusto nga motunhay ang inyong paghinigalaay.
(3.) LIMPYO ANG DAGWAY – Tingali daghan ang molikay kanimo nga makighigala tungod sa dagway mo. Mapahiyumon ka man apan dili hapsay ang pamisti mo. Kinahanglang humot ang ginhawa ug madanihon ang baho sa lawas.
(4.) MAGBINUOTAN – Aron daghan ka’g mga higala, pagbinuotan kay sagad nga gusto sa higalaon, di kanang nagbuwa lang sa pintok o bastos nga baba. Mokonsiderar nga mosabot ug matinahuron, maoy yawe sa daghang mahigala.
(5.) MAMINAW – Magpaminaway nga mohatag og higayon sa ikahinabi. Dili kay imo lang tanan ang gusto paminawon. Isig tampohay og maayong hunahuna.
Morespeto ug matinud-anon nga magkasinabtanay sa ikaayo sa managhigala.
Kun daghan ka nag mga higala, ampingi nga matun-an mo usab ang mga kinaiya nga mabatonan ang pagsalig hangtud maila mo ang tinuoray o matuod nga higala nga kasandigan sa ikalambo sa imong mga pangandoy sa kinabuhi.