Wala pa gihapon mahuman hangtod karon ang kalandrakas sa Bureau of Customs. Human pabalika sa ilang mga mother unit ug gipangbalhin ang tag-as nga mga opisyal sa nahisgotang buhatan nga miresulta sa paghagsa sa collection sa buhis, nagsige pa gihapon ang ilang kalandrakas.
Sa miaging semana si Atty. Maria Lourdes Mangaoang dala ang temporary restraining order sa huwes sa Makati mihagit sa hukom ni Customs Commissioner Ruffy Biazon sa pagbutang ni Atty. Paul Alcazaren isip OIC District Collector sa Port of Cebu.
Ang abogada kinsa mao ang deputy collector for assessment miingon dapat siya unta ang angayang mahimong OIC District Collector ug kun dili man si deputy collector for operation Ahmed Erpe tungod kay mas taas sila og ranggo kay ni Alcazaren. Daw nahisama kuno sila sa sundawo nga heneral nga gimandoan lang og major. Si Mangaoang ug Erpe pulos collector 5 samtang si Alcazaren collector 3. Gawas sa maong rason giingon usab ni Atty. Mangaoang nga kalapasan sa election ban ang gihimo ni Customs Commissioner Ruffy Biazon.
Bisan kinsa nilang tulo ni Mangaoang, Erpe ug Alcazaren ang mahimong collector wala gyu’y problema ang Sugbo tungod kay pulos sila adunay mga kapasidad. Pulos sila adunay mga agi kun hisgotan ang collection sa buhis sa Bureau of Customs. Sa ilang pagdumala halos tanang higayon surplus ang ilang collection dili sama sa ubang porte nga kanunay lang alkanse sa pagkolekta og buhis.
Kun mas ubos man og ranggo si Atty. Paul Alcazaren nga gihimong OIC District Collector sa Bureau of Customs sa Port of Cebu kun itandi ni Atty. Maria Lourdes Mangaoang ug Ahmed Erpe, wala siya’y mahimo kay dili man siya ang nagbuot nga makuptan niya ang maong posisyon karon. Sama sa sundawo igo ra usab siyang misunod sa mando sa iyang labaw nga mas heneral pa ni Mangaoang ug Erpe.